Кіраўнік дзяржавы наведаў новую бальніцу ў Мёрах

Рабочая паездка Кіраўніка дзяржавы - гэта заўсёды падстава шырэй зірнуць на праблемы і вызначыцца са стратэгіяй развіцця, прычым самага рознага маштабу. Размова можа ісці як пра стан спраў у асобна ўзятай гаспадарцы, так і рэгіёна ў цэлым. Першае, што цікавіць беларускага лідара, - якасць жыцця ў прынцыпе. А імпульс вырашэнню праблем надаюць канкрэтныя даручэнні. Зусім нядаўна ўпрыгажэннем Мёраў стаў бальнічны гарадок. Новы сацыяльна важны аб'ект стане зарукай і эканамічнага росту раёна. Буйны інвестар тут жа будуе металапракатны завод. У планах узвесці побач з бальніцай медцэнтр, сертыфікаваны па еўрапейскіх стандартах. У клініцы атрымаюць лячэнне пацыенты з захворваннямі сэрца і нервовай сістэмы. Акрамя таго, іншаземцы абяцаюць паставіць дыягнастычнае абсталяванне яшчэ ў 6 заходніх раёнаў Віцебшчыны. Кіраўнік дзяржавы падтрымаў гэтую ідэю.

Ілона Красуцкая аб унікальным для рэгіёна прыкладзе прыватна-дзяржаўнага партнёрства. Вельмі шмат гадоў жыхары Мёраў і раёна нібыта кожны дзень рыхтаваліся да паўмарафону. Ім пастаянна даводзілася праводзіць квест пад назвай "у пошуках здароўя", бо карпусы цэнтральнай бальніцы знаходзіліся па 11 розных адрасах. Новая прапіска пазбавіла ад галаўнога болю і ўрачоў, і пацыентаў.

Адкрыцця новай бальніцы ў Мёрах чакалі чвэрць стагоддзя. Менавіта столькі будаваўся корпус. Будоўля некалькі разоў то спынялася, то аднаўлялася. Ад хранічнага дыягназу "даўгабуд" корпус раённай бальніцы вылечыла даручэнне Прэзідэнта.

Аб'ект уключылі ў дзяржінвестпраграму. Бальніцу адкрылі ў маі гэтага года. Неабходную дапамогу жыхары райцэнтра зараз атрымліваюць у камфортных умовах.

У бальнічным гарадку побач з аддзяленнямі размешчана клініка-дыягнастычная лабараторыя, харчаблок, хуткая. Усе карпусы злучаныя паміж сабою падземным пераходам. Зараз у 20-тысячнага Мёрскага раёна самае сучаснае абсталяванне, як і ў сталіцы.

З адкрыццём новай бальніцы медыцына ў райцэнтры выйшла на новы ўзровень. Брыгады хуткай дапамогі зараз выязджаюць на выклік з планшэтамі. Даведацца неабходную інфармацыю аб пацыенце можна яшчэ па дарозе.

Калі Дар'я падрасце, будзе са здзіўленнем разглядаць гэтыя кадры. Тут ёй усяго пяць дзён. Малютка стала першым і вельмі жаданым дзіцем у сям'і Конах. На свет дзяўчынка з'явілася ў Мёрскай бальніцы. Усяго з моманту адкрыцця гэтыя сцены чулі першы плач 27 дзяцей. Для мам і немаўлят у новым корпусе створаны максімальна камфортныя ўмовы: прасторныя светлыя палаты, пеленальныя столікі з падагрэвам.

Мёрскі раён сёння наведвае Кіраўнік дзяржавы. Пасля бяспекі харчовай размова пра бяспеку чалавечага жыцця і ўжо тым больш дзіцяці. Прэзідэнт прыехаў паглядзець і абноўленую бальніцу.

Пра новы комплекс Аляксандру Лукашэнку распавядае галоўны ўрач Алена Сівая. Паспаць напярэдадні ёй не атрымалася, але не толькі з-за хвалюючага візіту Прэзідэнта. Ноччу ў бальніцу паступіў цяжкі хворы, але абышлося без аперацыі. Прэзідэнту дэманструюць гонар комплексу - найноўшы рэнтген-кабінет. Да гэтага апаратура ў бальніцы была плёначнай. На змену прыйшлі лічбавыя тэхналогіі.

Апроч цэнтральнай бальніцы, меддапамогу ў раёне аказваюць яшчэ дзве - сястрынскага догляду і ўчастковая плюс 26 ФАПаў і 3 амбулаторыі ўрача агульнай практыкі. Міністр аховы здароўя распавядае, гэты інстытут актыўна будуць распаўсюджваць на астатнія рэгіёны.

Кіраўнік дзяржавы пагутарыў з пацыентамі, якія зараз атрымліваюць лячэнне. Каб выздараўленне праходзіла хутчэй, Аляксандр Лукашэнка прывёз ім падарункі. У кошыках усё самае смачнае і карыснае: садавіна, зефір і вядомая ўжо не толькі ў Беларусі, але і за мяжой навінка пад брэндам "Прэзідэнт. Эксклюзіў" - натуральны шакалад без цукру.

З абсталявання тут сабрана ўсё лепшае, што створана ў свеце акушэрства і гінекалогіі. Гонар аддзялення - ультрасучасны кювез. Ён дае другое жыццё малым, якія нарадзіліся на свет зусім маленькімі. Летась у рэгіёне з'явілася 219 новых жыхароў. Ні аднаго выпадку матчынай або дзіцячай смяротнасці.

Апошнія 10 гадоў назіраецца рост нараджальнасці ва ўсіх рэгіёнах краіны. Штогод на свет з'яўляецца больш за 100 тысяч немаўлят. Прытым усё часцей беларусы адважваюцца на другое і трэцяе дзіця. Да нас едуць нараджаць з-за мяжы, у першую чаргу з Расіі і Украіны. Беларусь уваходзіць у топ-10 краін з самай нізкай дзіцячай смяротнасцю. Нашы ўрачы выходжваюць і нованароджаных з масай цела каля 500 грамаў.

Пакуль Кіраўнік дзяржавы знаёміўся з абсталяваннем бальніцы, мамамі рыхтаваліся стаць дзве пацыенткі. У медперсанала ёсць свой дэвіз: роды - гэта свята для жанчыны. Дызайн падбіралі так, каб усё радавала вока маладых мам. Па сястрычку для старэйшага сына сюды вярнулася і Вікторыя Пальчэўская. Пакуль маленькая Вераніка спіць, мама марыць пра трэцяе дзіця.

Кіраўнік дзяржавы пабываў і ў палатах. Цікавіўся здароўем мам і нованароджаных. Для многіх жанчын гэта ўжо другое дзіця. Аляксандр Лукашэнка папрасіў іх абавязкова вяртацца сюды яшчэ па 3 і 4 малыша. А каб дэмаграфічныя паказчыкі імкнуліся выключна ўверх, у краіне прадоўжаць мадэрнізацыю і будаўніцтва новых медустаноў.

Бальнічны гарадок сапраўды ўпрыгажэнне райцэнтра. Новы сацыяльна важны аб'ект стане зарукай і эканамічнага росту раёна. Бізнесмен Аляксей Кавалёнак, чыё дзяцінства прайшло ў Мёрах, будуе тут металапракатны завод з прыцягненнем нямецкіх інвестыцый. Ён хоча пабудаваць побач з мёрскай бальніцай медцэнтр, сертыфікаваны па еўрапейскіх стандартах. У клініцы атрымаюць лячэнне пацыенты з захворваннямі сэрца і нервовай сістэмы. Акрамя таго, іншаземцы абяцаюць паставіць дыягнастычнае абсталяванне ў 6 заходніх раёнаў Віцебшчыны. Прэзідэнт падтрымаў гэтую ідэю. Унікальны праект стане прыкладам дзяржаўна-прыватнага партнёрства.

У маленькага (8-тысячнага) горада сапраўды вялікія планы. Новыя методыкі лячэння і абследавання, высокатэхналагічныя аперацыі. А ў перспектыве будаўніцтва новага кардыякомплексу дазволіць развіваць медыцынскі турызм - побач мяжа Латвіі і Літвы. Але што самае галоўнае - зараз не трэба ехаць па неабходную дапамогу ў абласны цэнтр або сталіцу. Бо хутчэй ісці на папраўку прасцей дома, а такія сцены і кадры дакладна гарантуюць хуткае выздараўленне.