Аляксандр Лукашэнка: Літасці за карупцыю нікому не будзе

Літасці за карупцыю нікому не будзе. Гэта заявіў Прэзідэнт Беларусі Аляксандр Лукашэнка сёння, прымаючы кадравыя рашэнні.

Нагадаем, апошнім часам была паведамлена інфармацыя аб гучных карупцыйных справах у самых розных сферах - ад энергетыкі да аховы здароўя. Падчас прызначэння Аляксандра Гучка, новага старшыні Вышэйшай атэстацыйнай камісіі, Прэзідэнт адзначыў: прынцыповасць, сумленнасць і шчырасць - найважнейшыя рысы новых кіраўнікоў. Прычым, гэтыя словы Аляксандра Лукашэнкі адносяцца да ўсіх без выключэння.

Так, сёння сталі вядомыя новыя кіраўнікі беларускіх дыппрадстаўніцтваў за мяжой, у шэрагах мясцовай вертыкалі ўлады, у дзяржарганізацыях і міністэрствах. Генадзя Трубілу, які займаў пасаду намесніка міністра ЖКГ, павысілі да першага намесніка. А яго месца з гэтага часу ў Віталя Смірнова. Экс-кіраўнік Цэнтральнага раёна Мінска Ігар Бузоўскі з гэтага дня намеснік міністра інфармацыі. А сталічны раён узначаліць Дзмітрый Пятруша. Новы намеснік старшыні ў Мінскім аблвыканкаме. Гэта Мікалай Рагашчук. Анатоль Шчуплянкоў з гэтага часу ўзначаліць Бялыніцкі раён. А Круглянскім раёнам будзе кіраваць Іван Барташэвіч.

Новыя прызначэнні і сярод дыпламатаў. Экс намеснік старшыні Гандлёва-прамысловай палаты Вячаслаў Брыль зараз пасол у Нігерыі і па сумяшчальніцтве ў Гане і Камеруне. Аляксей Швед узначаліць консульства Беларусі ў Стамбуле. Новы кіраўнік і ў прадпрыемства "Белшына". Гэта Уладзімір Карпяк.