Аляксандр Лукашэнка прыбыў у Казахстан для ўдзелу ў сесіі Савета АДКБ

Сёння Аляксандр Лукашэнка возьме ўдзел у сесіі Савета АДКБ. Як паведамілі ў прэс-службе Прэзідэнта, запланаваны перамовы кіраўнікоў дзяржаў АДКБ у вузкім і пашыраным фарматах. На парадку дня абмеркаванне актуальных праблем міжнароднай і рэгіянальнай бяспекі, тэматыка ўзаемадзеяння на міжнароднай арэне, а таксама пытанні дзейнасці АДКБ, у тым ліку кадравыя, арганізацыйныя і фінансавыя аспекты. Па выніках саміту прадугледжана падпісанне шэрагу міжнародных дакументаў.

Перад сустрэчай кіраўнікоў дзяржаў на першым сумесным пасяджэнні сілавых ведамстваў і міністраў замежных спраў шасці дзяржаў - членаў Арганізацыі, у тым ліку Беларусі, канчаткова ўзгоднены парадак дня. У прыватнасці, ён уключае падвядзенне вынікаў года пад старшынствам Казахстана, агульную дэкларацыю і заяву аб скаардынаваных мерах у дачыненні да ўдзельнікаў тэрарыстычных фарміраванняў. У прыярытэтах таксама стратэгія па барацьбе з незаконнай міграцыяй да 2025 года.

Усяго па выніках пасяджэння было ўзгоднена і падпісана больш за два дзясяткі рашэнняў.