Аляксандр Лукашэнка прыбыў у Маскву на чэмпіянат свету па футболе

Апошнім часам Аляксандр Лукашэнка і Уладзімір Пуцін бачацца часта. У маі палітыкі не толькі сустрэліся на палях саміту ЕАЭС, але і правялі двухбаковыя перамовы. На мінулым тыдні кіраўнікі дзяржаў бачыліся ў кітайскім Ціндаа на саміце Шанхайскай арганізацыі супрацоўніцтва.

А напярэдадні па запрашэнні свайго расійскага калегі Аляксандр Лукашэнка быў у Маскве на ўрачыстай цырымоніі адкрыцця чэмпіянату свету па футболе. Сустрэча ў аэрапорце ў прамым сэнсе прайшла "без гальштукаў". Аляксандра Лукашэнку прывітаў талісман мундыялю - Воўк Забівака. Прама перад трапам самалёта Кіраўнік беларускай дзяржавы згуляў з ім у футбол. Расійскія і замежныя СМІ актыўна тыражуюць фрагмент гэтага імправізаванага матча. Асабліва ён папулярны ў сацсетках. Журналісты і каментатары адзначаюць майстэрства беларускага лідара. З 3 мячоў Забівака змог адбіць толькі адзін. Тысячы праглядаў у Інтэрнэце набірае эпізод, калі Аляксандр Лукашэнка забівае гол пяткай. Вядомыя спартыўныя выданні напісалі: "Лепшы гол чэмпіянату ўжо забіты".

Дарэчы, пакінуўшы аўтограф на футбольным мячы мундыялю і надпіс: "Удачы братам-расіянам", Аляксандр Лукашэнка прадугадаў зыход стартавага матча. Як вядома, галоўнай падзеяй першага дня чэмпіянату свету стала пераканаўчая перамога зборнай Расіі над Саудаўскай Аравіяй, 5:0. На адкрыцці мундыялю прысутнічалі кіраўнікі мноства дзяржаў. На трыбуне Аляксандр Лукашэнка цёпла пагаварыў з Прэзідэнтам Расіі Уладзімірам Пуціным і калегамі з іншых краін. У ложы ганаровых гасцей суседзямі Кіраўніка беларускай дзяржавы сталі расійскі прэм'ер Дзмітрый Мядзведзеў і Прэзідэнт Азербайджана Ільхам Аліеў. Легендарныя маскоўскія "Лужнікі" сталі цэнтрам сусветнага футбола. Старту першага матча чэмпіянату папярэднічала яркая цырымонія адкрыцця. На вачах арэны ёмістасцю больш за 80 тысяч іспанскі галкіпер Ікер Касільяс і расійская мадэль Наталля Вадзянава прадэманстравалі галоўны трафей мундыялю. Свой самы вядомы хіт Feel выканаў Робі Уільямс. Парадаваў балельшчыкаў удзелам у цырымоніі і знакаміты Раналду.