Аляксандр Лукашэнка правядзе 19 чэрвеня перамовы з прэзідэнтам Расіі

Кіраўнік дзяржавы Аляксандр Лукашэнка правядзе 19 чэрвеня перамовы з Прэзідэнтам Расіі Уладзімірам Пуціным, які наведае Беларусь з афіцыйным візітам.

Падчас сустрэчы ў вузкім складзе лідары дзвюх краін абмяркуюць стан і перспектывы развіцця двухбаковых адносін, рэалізацыю сумесных праектаў, узаемадзеянне ў інтэграцыйных фарматах і на міжнародных пляцоўках. Затым Аляксандр Лукашэнка і Уладзімір Пуцін прымуць удзел у пасяджэнні Вышэйшага Дзяржсавета Саюзнай дзяржавы. Парадак дня перамоў уключае каля дзясятка пытанняў. Вышэйшы орган Саюзнай дзяржавы разгледзіць вынікі беларуска-расійскага гандлёва-эканамічнага супрацоўніцтва за мінулы год, заслухае справаздачу Савета Міністраў аб выкананні бюджэту Саюзнай дзяржавы за 2016, абмяркуе праграму ўзгодненых дзеянняў у галіне знешняй палітыкі на гэты і наступны гады. Размова пойдзе таксама аб выкананні прыярытэтных кірункаў і задач далейшага развіцця інтэграцыйнага аб'яднання. Па выніках пасяджэння чакаецца падпісанне шэрагу дакументаў.