Аляксандр Лукашэнка: З моцным Кітаем будзе моцнай і Беларусь

З моцным Кітаем будзе моцнай і Беларусь. Аб гэтым Аляксандр Лукашэнка заявіў сёння падчас перамоў са Старшынёй КНР Сі Цзіньпінам.

Сустрэча адбылася на палях саміту Шанхайскай арганізацыі супрацоўніцтва ў Цындаа. Кіраўнік дзяржавы павіншаваў кітайскі бок з завяршэннем старшынства ў Шанхайскай арганізацыі супрацоўніцтва і адзначыў, што мінулы саміт стаў сапраўды знакавай падзеяй.

Па выніках перамоў лідараў Беларусі і Кітая стала вядома, што дзяржавы ўстанаўліваюць бязвізавы рэжым для ўладальнікаў звычайных пашпартоў. Адпаведнае міжурадавае пагадненне ўжо падпісана. Раней Беларусь прадставіла свае глабальныя прапановы па пашырэнні кірункаў супрацоўніцтва ў Вялікай Еўразіі. На пасяджэнні Савета кіраўнікоў дзяржаў Шанхайскай арганізацыі супрацоўніцтва Аляксандр Лукашэнка падкрэсліў, што менавіта практычная эканамічная кааперацыя краін-членаў з дзяржавамі-назіральнікамі і партнёрамі, эфектыўнае выкарыстанне іх транзітных і лагістычных магчымасцяў можа стаць адным з перспектыўных кірункаў развіцця арганізацыі. Яркім прыкладам такой кааперацыі служыць індустрыяльны парк "Вялікі камень". Сярод беларускіх ініцыятыў форуму і стварэнне ІТ-экасістэмы арганізацыі, якая аб'яднае магчымасці электронных СМІ, сацыяльных сетак і электроннага гандлю. Таксама Аляксандр Лукашэнка прапанаваў задзейнічаць магчымасці Беларусі для ўмацавання харчовай бяспекі еўразійскага рэгіёна.

Па выніках саміту лідары краін Шанхайскай арганізацыі супрацоўніцтва прынялі Цындааскую дэкларацыю. Увогуле было прынята 17 дакументаў. У іх ліку рашэнне Савета кіраўнікоў дзяржаў аб доўгатэрміновым добрасуседстве, сяброўстве і супрацоўніцтве. Таксама зацверджаныя ініцыятывы па процідзеянні тэрарызму, сепаратызму і экстрэмізму.