Лукашэнка: Еўропе вайнушка чарговая і канфлікты не патрэбныя, гэта трэба амерыканцам

Беларусь цалкам адкрытая для дыялогу ў вырашэнні міграцыйнага крызісу. Гэта сёння яшчэ раз асабіста прадэманстраваў Аляксандр Лукашэнка, адказваючы на пытанні журналістаў, прычым не толькі беларускіх. У лагеры для бежанцаў працуюць у тым ліку і прадстаўнікі замежных СМІ - нам утойваць няма чаго. Прэзідэнт шчыра і адкрыта адказаў кожнаму, не абышлося і без абвяржэнняў чарговых фэйкаў. Вераніка Бута сабрала асноўнае.

Сітуацыя на беларуска-польскай мяжы не сыходзіць з навінавых стужак ужо трэці тыдзень. Дзясяткі журналістаў (і беларускіх, і замежных) кругласутачна маюць доступ у лагер бежанцаў. Максімальная адкрытасць. Але тыя, хто так і не даехаў да нас, каб акунуцца ў праблему, усё яшчэ хайпуюць на загалоўках, якія нагналі аскому - маўляў, Беларусі выгадны крызіс з бежанцамі. Прэзідэнт сёння чарговы раз абвергне не адзін такі фэйк.

Наадварот Беларусь робіць усё, каб бежанцы змаглі альбо вярнуцца дадому (хто захоча), альбо ўсё ж дачакацца зялёнага святла з Еўропы. Стварыць такія магчымасці Аляксандра Лукашэнку, нагадаем, папрасіла спадарыня Меркель.

Той выпадак, калі дзеля рэабілітацыі польскіх улад у вачах сваіх выбаршчыкаў (а рэйтынгі імкліва падаюць) і наладжвання дыялогу Варшавы і ЕС, там гатовыя ахвяраваць жывымі людзьмі. Ці не занадта высокая цана пытання? Беларусь не супраць весці дыялог на любым узроўні, галоўнае - абараніць людзей. Але дыялог павінен быць сумленным.

Наша краіна ўсяляк спрыяе вырашэнню міграцыйнага крызісу на мяжы і стварае чалавечыя ўмовы для бежанцаў. А што Захад, міжнародныя арганізацыі? Больш падобна на самапіяр. Асноўную нагрузку па арганізацыі побыту і гуманітарнай дапамогі бежанцам узялі на сябе неабыякавыя беларусы. Так, нам і сапраўды выгадны гэты крызіс?

У сітуацыі з бежанцамі, перакананы Прэзідэнт, фінансавая дапамога магчыма з розных бакоў, у тым ліку і дыяспар. Адказваючы на адно з пытанняў ад замежных СМІ, Аляксандр Лукашэнка не выключыў, што пагодзіцца дапамагчы і прэзідэнт Турцыі.

Прэзідэнт яшчэ раз агучыў меседж сусветным СМІ - наша краіна не жадае ніякай вайны і супрацьстаяння ў цэнтры Еўропы. Зрэшты, уступаць у адкрытую барацьбу не ў інтарэсах і самога Еўрасаюза. Дык каму гэта ўсё трэба?

Журналісты падзяліліся назіраннем - некаторыя прадстаўнікі Захаду, міжнародных арганізацый практычна не ідуць на кантакт са СМІ. Прэзідэнта гэтая сітуацыя зусім не здзівіла.

І яшчэ важны пасыл ад Прэзідэнта - папракаць нас у патуранні - поўная дурасць. Беларусь перарывае спробы нелегальнай міграцыі, ахоўваючы сваю мяжу. Але абараняць Захад ад міграцыйных патокаў… зрабіце ласку. Закон бумеранга - у дзеянні. Да вас вяртаецца ўсё, што вы аддаяце.