Дэталі візіту азербайджанскага лідара абмеркавалі ў Кіраўніка дзяржавы

Беларуска-азербайджанскія адносіны сёння ў цэнтры ўвагі ў Палацы Незалежнасці. Праз тыдзень Мінск наведае азербайджанскі лідар, дэталі візіту абмеркавалі ў Кіраўніка дзяржавы.

У краін няма закрытых тэм, адзначыў сёння Прэзідэнт Беларусі на сустрэчы з паслом Азербайджана ў Мінску. На высокім узроўні і пытанні гандлю, і гуманітарнае супрацоўніцтва. Прэзідэнты падтрымліваюць адзін аднаго і на сусветнай арэне. Закрануў Аляксандр Лукашэнка і тэму мінулага саміта АДКБ у Астане. Кіраўнік дзяржавы не хаваў здзіўлення, чаму тэма змены генсака выклікала такое бурнае абмеркаванне. Бо асноўным на саміце ўсё ж было пытанне знешнепалітычнай сітуацыі вакол краін АДКБ. А рашэнне аб новым кіраўніку Арганізацыі прымуць на сустрэчы ў Санкт-Пецярбургу 6 снежня.

Абмеркавалі і эканамічныя пытанні. Беларусі і Азербайджану атрымалася пераадолець спад ва ўзаемным гандлі. Так, за дзевяць месяцаў гэтага года тавараабарот павялічыўся ў тры разы і перавысіў 331 млн долараў. Умацаванню супрацоўніцтва спрыяюць сяброўскія адносіны на ўзроўні кіраўнікоў дзяржаў і абмен візітамі на вышэйшым узроўні. Пасол Азербайджана лічыць сімвалічным, што чарговы візіт Ільхама Аліева ў Мінск адбудзецца ў год 25-годдзя ўстанаўлення дыпламатычных адносін паміж краінамі.

Падчас сустрэчы з Аляксандрам Лукашэнкам дыпламат падкрэсліў, што азербайджанскі народ шануе беларускага лідара, а асабістыя адносіны прэзідэнтаў - гэта добры прыклад міждзяржаўных адносін.