Фарміраванне спрыяльнага асяроддзя для ўстойлівага развіцця эканомікі - асноўная задача Нацбанка

Сітуацыя на фінансавым рынку, узмацненне адказнасці Нацбанка за яе стабільнасць і мерапрыемствы да 25-годдзя беларускага рубля. Гэтыя тэмы сёння сталі ключавымі на сустрэчы Кіраўніка дзяржавы са старшынёй праўлення галоўнага фінансавага рэгулятара Паўлам Калаўрам.

За апошні год удалося дабіцца стабільнасці. І ў гэтым Прэзідэнт бачыць немалую заслугу Нацбанка. Цяперашняя грашова-крэдытная палітыка адпавядае пастаўленай мэце па інфляцыі - да канца года чакаецца абмежаванне лічбы ў межах 5 %. Фарміраванне спрыяльнага асяроддзя для ўстойлівага развіцця эканомікі - асноўная задача Нацбанка. Адказнасць за фінансавую стабільнасць ускладзена на старшыню праўлення. Аднак, на думку кіраўніцтва рэгулятара, традыцыйных інструментаў грашова-крэдытнай палітыкі і банкаўскага нагляду можа аказацца недастаткова. Таму прапануецца ўзмацніць паўнамоцтвы Нацбанка і замацаваць яго адказнасць у дадзенай сферы. Кіраўнік дзяржавы гэтую ініцыятыву падтрымаў.

Літаральна напярэдадні Нацбанк азнаёміў грамадскасць са звесткамі аб сітуацыі на фінансавым рынку. Назіраецца станоўчая дынаміка. Пакуль вырашана захаваць стаўку рэфінансавання ў краіне на ўзроўні гістарычнага мінімуму - 10 %. У кіраўніцтва рэгулятара ёсць дакладнае бачанне, якія меры прымаць для эканамічнага росту ў гэтым годзе, стратэгія для нівелявання знешніх рызык і падтрымкі нізкай інфляцыі.

На сустрэчы таксама абмяркоўваліся магчымыя фарматы правядзення мерапрыемстваў да 25-годдзя беларускага рубля. Нацыянальны банк сумесна з Саўмінам мае намер распрацаваць стратэгію па павышэнні даверу да нацыянальнай валюты. У абарачэнні з'явяцца абноўленыя купюры наміналам 5 і 10 рублёў, а таксама манеты: 1, 2 капейкі і 2 рублі. У планах выданне каталога банкнот і манет Беларусі. А для журналістаў арганізуюць экскурсію ў цэнтральнае сховішча Нацбанка.