Вынікі сустрэчы Прэзідэнта Беларусі з федэральным канцлерам Аўстрыі

Беларусі і Аўстрыі неабходна нарошчваць двухбаковыя супрацоўніцтва ў гандлёва-эканамічнай сферы. Пра гэта сёння заявіў Прэзідэнт Аляксандр Лукашэнка на сустрэчы з федэральным канцлерам Аўстрыі.

Перамовы ў Палацы Незалежнасці - гэта яшчэ адзін крок для вызначэння далейшых перспектыў беларуска-аўстрыйскага супрацоўніцтва. У гэтым плане наладжана трывалая база, ды і палітыкі знаёмыя даўно. Раней Себасцьян Курц ужо двойчы наведваў Беларусь у якасці кіраўніка МЗС Аўстрыі.

Але калі палітычныя кантакты адрозніваюцца добрай дынамікай, тавараабарот пакуль адстае. Летась ён перавысіў 170 мільёнаў долараў. Асноўныя артыкулы беларускага экспарту - прадукцыя лясной і дрэваапрацоўчай прамысловасці, нафтапрадукты. Аўстрыя стабільна ўваходзіць у лік найбуйнейшых інвестараў у эканоміку Беларусі. У нашай краіне зарэгістравана больш за 80 прадпрыемстваў з аўстрыйскім капіталам. У 2018 прыцягнута інвестыцый на суму амаль 300 мільёнаў долараў.

Па выніках сустрэчы Аляксандр Лукашэнка і федэральны канцлер Аўстрыі Себасцьян Курц зрабілі заявы для прэсы - назвалі перспектывы па лініі двухбаковага ўзаемадзеяння. Беларусь і Аўстрыя пацвярджаюць высокі ўзровень і пазітыўную дынаміку яго развіцця. Еўрапейская дзяржава адыгрывае важную ролю ў мадэрнізацыі шэрагу галін беларускай эканомікі, у тым ліку дрэваапрацоўкі, тэлекамунікацый, банкаўскага сектара. Краіны і надалей маюць намер пашыраць узаемадзеянне па вызначаных, а таксама іншых інавацыйных кірунках.

На памяць аб гэтай сустрэчы палітыкі абмяняліся падарункамі. Кіраўнік беларускай дзяржавы паднёс федэральнаму канцлеру Аўстрыі абраз святой Сафіі Слуцкай і той самы знакаміты шакалад "Прэзідэнт", які Аляксандр Лукашэнка па традыцыі дорыць шматлікім кіраўнікам дзяржаў. У сваю чаргу, ведаючы пра захапленне беларускага лідара лыжным спортам, Себасцьян Курц паднёс Аляксандру Лукашэнку горныя лыжы.

Гэта другі заключны дзень візіту Себасцьяна Курца ў Мінск. Яго праграма была вельмі насычанай. Напярэдадні разам з беларускім лідарам аўстрыйскі канцлер пабываў у Трасцянцы, дзе быў адкрыты манумент пад назвай "Масіў імёнаў", прысвечаны памяці больш як 10 тысяч грамадзян Аўстрыі, якія загінулі ў лагеры смерці ў гады Другой сусветнай вайны.