Кодэкс дзяржаўнага службоўца будзе распрацаваны ў найбліжэйшыя месяцы

На дзяржслужбу трэба прыцягваць самых лепшых і вопытных кіраванцаў. На нарадзе ў Прэзідэнта сёння абмяркоўвалі развіццё інстытута дзяржслужбы.

Кадравыя пытанні традыцыйна ў цэнтры ўвагі Прэзідэнта. Ад прафесіяналізму кіраванцаў залежыць рэалізацыя маштабных праектаў і паляпшэнне дабрабыту народу. Людзі павінны не проста валодаць высокімі маральнымі якасцямі - для іх важны шырокі кругагляд, бачанне стратэгічных задач і ацэнка наступстваў сваіх рашэнняў. Патрабаванні да кіраванцаў дзяржапарата павінны быць самымі высокімі. Пасля гэтага ідзе размова пра тое, каб зрабіць дзяржслужбу прывабнай і ганаровай. Яшчэ адна актуальная задача - своечасова закрываць вакантныя пасады. На асобных пазіцыях падбор кандыдатаў часам зацягваецца на месяцы і нават гады.

Таксама прынцыповае патрабаванне Прэзідэнта - ні намёку на карупцыю ў дзяржапараце.

Наспела і неабходнасць перагледзець закон аб дзяржслужбе, а таксама падрыхтаваць своеасаблівы статут або кодэкс дзяржаўнага службоўца. Гэты дакумент павінен быць абсалютна справядлівым і празрыстым, у ім неабходна прапісаць кожную дэталь, каб любы чалавек разумеў сутнасць заканадаўчага акта. Таксама сёння на нарадзе прынята рашэнне стварыць рабочую групу, прычым не з ліку дзяржслужбоўцаў, якая разгледзіць усе паднятыя пытанні і занясе свае прапановы па рэалізацыі задач. Прэзідэнт пазначыў і выразныя часавыя рамкі: дакументы неабходна падрыхтаваць у найбліжэйшыя месяцы, каб ужо з новага года яны ўвайшлі ў сілу.

У апошнія гады ў Беларусі ідзе маштабная аптымізацыя дзяржапарату. Колькасць дзяржслужбоўцаў ужо скарацілася на чвэрць і сёння складае крыху больш за 30 000.