Каманда НАК з удзелам Прэзідэнта Беларусі перамагла ў лыжаролернай эстафеце

У свяце прыняў удзел і Кіраўнік дзяржавы. Каманда НАК з удзелам Прэзідэнта перамагла ў лыжаролернай эстафеце. Гонка сярод каманд сілавых ведамстваў і органаў дзяржкіравання прайшла ў рамках масавага фізкультурна-спартыўнага свята ля праспекта Пераможцаў. Сюды Аляксандр Лукашэнка прыбыў на лыжаролерах, а ўслед за Прэзідэнтам на роліках прыехаў яго малодшы сын Мікалай. У квартэце з Кіраўніком дзяржавы выступілі: алімпійская чэмпіёнка па біятлоне Надзея Скардзіна, канькабежцы Марына Зуева і Ігнат Галавацюк. Кожны з удзельнікаў пераадолеў дыстанцыю 2 кіламетры 800 метраў. Аляксандр Лукашэнка завяршаў эстафету і фінішаваў першым.

Другое месца ў эстафеце заняла каманда Камітэта дзяржбяспекі. Бронзавым прызёрам стаў квартэт з Міністэрства спорту і турызму, фінішорам у якім быў кіраўнік ведамства Сяргей Кавальчук. Таксама ў гонцы прынялі ўдзел каманды Пагранічнага і Мытнага камітэтаў, Міністэрства адукацыі, МУС, Міністэрства аховы здароўя, а таксама Мінабароны і МНС. Гэта структура была прадстаўлена адразу дзвюма дружынам. Перад стартам Кіраўнік дзяржавы правёў невялікую размінку на дыстанцыі, а таксама пагутарыў са спартсменамі нацыянальнай зборнай па канькабежным спорце - Марынай Зуевай і Ігнатам Галавацюком.

А крыху раней вызначыліся пераможцы і прызёры сярод ВНУ і аматарскіх каманд у эстафеце на лыжаролерах і ролікавых каньках. Першае месца занялі студэнты Белдзяржуніверсітэта фізічнай культуры. Другое - педуніверсітэта імя Максіма Танка. Трэцімі сталі прадстаўнікі Акадэміі кіравання пры Прэзідэнце Беларусі. За гэту каманду выступала чэмпіёнка Паралімпійскіх гульняў Святлана Саханенка. Таксама ў забегу ў складзе дзвюх аматарскіх каманд узялі ўдзел: прэс-сакратар Прэзідэнта Беларусі Наталля Эйсмант і малодшы сын Кіраўніка дзяржавы Мікалай Лукашэнка, а таксама першы віцэ-прэзідэнт НАК Беларусі Андрэй Асташэвіч і галоўны трэнер хакейнага клуба "Юнацтва" Міхаіл Захараў.