Лукашэнка павіншаваў народ Грэцыі з Днём незалежнасці і запрасіў часцей наведваць Беларусь

Прэзідэнт Беларусі Аляксандр Лукашэнка павіншаваў народ Грэцыі з Днём незалежнасці. Пра гэта паведамляе БЕЛТА са спасылкай на прэс-службу беларускага лідара.

"Гэтае свята сімвалізуе сілу і адзінства народа Грэцыі ў барацьбе за свае самабытнасць і свабоду. Беларусы таксама перажылі суровыя выпрабаванні і даражаць уласнай гісторыяй, таму заўсёды з сімпатыяй ставіліся да грэкаў, выказваліся за падтрыманне і паглыбленне двухбаковых адносін. Упэўнены, што вяртанне нашых краін да канструктыўнага дыялогу вельмі важнае і ў больш шырокім кантэксце, з пункта погляду ўсталявання згоды ў еўрапейскім рэгіёне, стварэння мірнай і спакойнай будучыні", - гаворыцца ў віншаванні.

Кіраўнік дзяржавы пацвердзіў зацікаўленасць у аднаўленні і развіцці беларуска-грэчаскага супрацоўніцтва і запрасіў грамадзян Грэцыі часцей наведваць Беларусь, каб  пераканацца  ў яе гасціннасці і добразычлівасці.