Лукашэнка на мяжы: Наша задача - дапамагчы людзям, якія трапілі ў бяду

Беларусь не будзе гуляць і рабіць палітыку на лёсах бежанцаў. Такую заяву сёння зрабіў наш Прэзідэнт. Аляксандр Лукашэнка пабываў у лагістычным цэнтры побач з пунктам пропуску "Брузгі" на мяжы. Гэта было чакана, улічваючы, што беларускі лідар ніколі не адмахваецца ад людзей і вострых праблем. Кіраўнік дзяржавы напрамую гаварыў з тымі, хто захраснуў ля польскага кардона. Беларусь аказала бежанцам усю магчымую гуманітарную дапамогу, дала пляцоўку для размяшчэння (не пад адкрытым жа небам чакаць польскай міласці). Абагрэлі, накармілі, далі дах над галавой. Аляксандр Лукашэнка глядзеў, як уладкаваны побыт людзей, якія ёсць складанасці. Для іншаземцаў такі падыход першай асобы (быць заўсёды там, дзе цяжка) быў яўна ў навінку.

Звяртаючыся да людзей, Прэзідэнт сказаў галоўнае - Беларусь не пакіне іх у бядзе. Дапаможа тым, хто захоча вярнуцца. Эвакуіравана на радзіму ўжо каля тысячы мігрантаў. Прынцыпова важна, што Мінск не будзе сілай вяртаць людзей дадому. Як і не будзе перашкаджаць тым, хто ўсё ж, нягледзячы на ўсю жорсткасць польскага боку і ўсе нягоды, хоча трапіць на Захад. Аляксандр Лукашэнка звярнуўся з заклікам да народаў Германіі і Польшчы і растлумачыў, чаму так важна не зацягваць вырашэнне праблемы з бежанцамі на мяжы.

Г.з. Беларусь прытрымліваецца ўсё той жа пазіцыі - дапамагае людзям і гатовая ўсяляк садзейнічаць таму, каб сітуацыя з бежанцамі вырашылася як мага хутчэй.

Пасля, адказваючы на пытанні журналістаў, (а такой магчымасцю скарысталіся не толькі прадстаўнікі беларускіх СМІ, але і шэрагу замежных дзяржаў) Прэзідэнт яшчэ раз агучыў меседж сусветным СМІ - наша краіна не хоча ніякай вайны і супрацьстаяння ў цэнтры Еўропы. Зрэшты, гэта і не ў інтарэсах самой Еўропы. Чаго не скажаш пра Злучаныя Штаты Амерыкі, каму не ўпершыню ваяваць чужымі рукамі.

Аляксандр Лукашэнка абвергнуў заявы, што нібыта нам выгадны крызіс з бежанцамі. Прэзідэнт адзначыў: Беларусь у тым ліку з'яўляецца пацярпелым бокам у гэтай сітуацыі і тут няма ніякай выгады. Тым не менш кіраўнік дзяржавы запэўніў: Беларусь не супраць весці дыялог на любым узроўні, бо галоўнае - абараніць людзей.