Прэзідэнт Беларусі падпісаў закон аб рэспубліканскім бюджэце на 2022 год

Галоўны фінансавы дакумент краіны звярстаны з улікам цяперашніх рэалій. За аснову ўзяты базавы сцэнарый развіцця эканомікі, дзе рост ВУП меншы за працэнт. Бюджэт 2022 года - гэта амаль 28 млрд руб. даходаў і 30,5 млрд руб. выдаткаў. Дэфіцыт чакаецца ў памеры без малога 3 млрд руб. Але рэзервы для росту ёсць, таму галоўны кашалёк краіны, лічаць у Мінфіне, збалансаваны.

Акрамя таго, 45 % бюджэту запланавана на сацыяльную сферу. Гэтаму прыярытэту мы верныя заўсёды. Павялічаны выдаткі на ахову здароўя - амаль 8,5 млрд руб. Больш сродкаў атрымае і адукацыя - каля 8,6 млрд.

Таксама сёння падпісаны і абноўлены Падатковы кодэкс. Спрошчаная сістэма для ІП застаецца толькі ў тых, хто займаецца турыстычнымі, медыцынскімі паслугамі, грамадскім харчаваннем, камп'ютарным праграмаваннем і перавозкамі пасажыраў і грузаў. Астатнія будуць плаціць падаходны падатак.

Дакументам мяняюцца асобныя стаўкі падаткаў на прагнозны ўзровень інфляцыі. Таксама ўводзіцца ПДВ для замежных арганізацый і прадпрымальнікаў, якія гандлююць у інтэрнэт-прасторы і на электронных пляцоўках. Яшчэ адна навацыя - падатак на кватэру. Яго павінны будуць плаціць усе, у каго ва ўласнасці ёсць нерухомасць (нават адна кватэра, дача або пакой). Ільгота захоўваецца для пенсіянераў, інвалідаў, непаўналетніх і шматдзетных.

Падпісаны таксама законы "Аб бюджэце дзяржаўнага пазабюджэтнага фонду сацыяльнай абароны насельніцтва Рэспублікі Беларусь на 2022 год"і "Аб змяненні законаў па пытаннях падаткаабкладання".