Лукашэнка: Прафесія афіцэра сёння ганаровая і паважаная

Залог міру - моцная армія, якая ідзе ў нагу з часам. Вышэйшы афіцэрскі склад і выпускнікі венных ВНУ сёння ў Палацы Незалежнасці.

Перад сустрэчай з Прэзідэнтам невялікая экскурсія па сімвале беларускай дзяржаўнасці. У гэтых залах будуецца палітычная ўстойлівасць, а ў яе аснове ў тым ліку і ваенная моц.

Тры дзесяцігоддзі ў нашай краіне паслядоўна развіваецца сістэма абароны. Свет мяняецца, а з ім узбраенне і спосабы вядзення ваенных дзеянняў. Сучасны салдат і афіцэр павінен валодаць глыбокімі ведамі і разуменнем таго, што адбываецца.

Прэзідэнт нагадаў, што ўсе поспехі Беларусі ў ваенным будаўніцтве даліся няпроста. "25 гадоў таму аб прафесіі вайскоўца ішло шмат размоў. Многія з вас у той час яшчэ не насілі пагоны. Тады ў так званай ліберальнай прэсе сур'ёзна абмяркоўвалі пытанне, навошта нам наогул армія. Прафесія афіцэра сёння ганаровая і паважаная. Застаюцца і захоўваюцца сапраўдныя каштоўнасці: вера, абавязак перад сваім народам, служба на карысць Айчыны", - заявіў беларускі лідар.

Паводле яго слоў, асабліва гэта заўважна на прыкладзе міліцыі, служыць у якой сёння хочуць многія маладыя людзі.

Шмат у чым заслуга цяперашняга пакалення афіцэраў – мір у нашай краіне. Два гады таму Захаду не ўдалося расхістаць сітуацыю знутры. А зараз падзеі, што адбываюцца прама каля нашых межаў, патрабуюць пільнай увагі і канцэнтрацыі.

Кіраўнік дзяржавы канстатаваў, што заходнія краіны актыўна вядуць разведку на зямлі і ў паветры, асвойваюць ваенную лагістыку, праводзяць вучэнні, перакідваюць тэхніку і запасы з іншых рэгіёнаў, паралельна павялічваюцца ваенныя бюджэты.

"Трансфармацыя свету ў шматпалярную мадэль непазбежна звязана з канфліктамі. Заакіянскі гегемон чапляецца за свае былыя пазіцыі самымі радыкальнымі ваеннымі метадамі. А ў вялікай вайне пераможца быць не можа", - яшчэ раз нагадаў Прэзідэнт.

Наша краіна ведае цану глабальных канфліктаў і заўсёды выступае за мірнае вырашэнне ўсіх пытанняў. Менавіта ад якасці працы афіцэрскай эліты ў цяперашні няпросты час залежыць спакойнае жыццё беларусаў і стабільнасць у грамадстве.

Сёння Прэзідэнт уручыў выпускнікам ваенных ВНУ і вышэйшаму афіцэрскаму складу падзякі, а таксама ім прысвоены чарговыя воінскія званні.

У працяг цырымоніі ўшанавання кіраўнік дзяржавы яшчэ пагаварыў з вайскоўцамі. Гаварылі, зразумела, пра бяспеку.

Як адзначыў беларускі лідар, у зале сабраліся людзі ваенныя, якіх рыхтуюць для вайны. Але галоўная задача - зрабіць усё, каб гэтай вайны не было.