Мінск і Масква падводзяць вынікі Вышэйшага дзяржсавета Саюзнай дзяржавы

Вызначыўся курс, якім краіны будуць рухацца ў наступныя два гады. Аляксандр Лукашэнка і Уладзімір Пуцін учора абмеркавалі ўсе назапашаныя пытанні. Вядома, цэнтральнай тэмай была эканоміка. За мінулы год тавараабарот павялічыўся амаль на чвэрць. Замацаваць дадатныя тэндэнцыі трэба за кошт здымання ўзаемных бар'ераў і стварэння роўнага канкурэнтнага асяроддзя. Такое меркаванне выказаў Аляксандр Лукашэнка. Сёння Беларусь і Расія звязаныя літаральна ва ўсіх сферах - ад АПК і прамысловасці да космасу і ўзвядзення нашай АЭС. Асобна ўчора спыніліся і на тэме памежнага кантролю на беларуска-расійскай мяжы.

З дзевяці пунктаў парадку дня пяць прынялі без абмеркавання. Дэталёва спыніліся толькі на трох ключавых дакументах. Адзін з іх пазначае прыярытэтныя кірункі развіцця Саюзнай дзяржавы на наступныя пяць гадоў. У ім прапісаныя дзеянні для здымання бар'ераў, узгодненая прамысловая палітыка, фарміраванне адзінага паліўнага рынку. Паставілі подпісы і пад праграмай дзеянняў у знешняй палітыцы. Яна захавала курс на ўмацаванне супрацоўніцтва на пляцоўках СНД і АДКБ. Таксама ўдзельнікі зацвердзілі прэмію Саюзнай дзяржавы ў галіне навукі і тэхнікі, што стане стымулам для навукоўцаў дзвюх краін.

На ўзроўні рэгіёнаў і муніцыпальных утварэнняў складзена тры сотні дамоў аб супрацоўніцтве. Праводзяцца сумесныя форумы рэгіёнаў дзвюх краін. Чарговы пройдзе ў кастрычніку ў Магілёве, дзе і адбудзецца наступная сустрэча прэзідэнтаў. Вышэйшы дзяржсавет чарговы раз пацвердзіў, што спрэчныя пытанні, якія часам узнікаюць, будуць вырашацца ў духу паразумення і кампрамісу.