Шмат пытанняў напярэдадні ў Гродне студэнты задалі Прэзідэнту

Аб беларускай адукацыі, любві да сваёй краіны, праблемах студэнцтва і асабістым. Шмат пытанняў напярэдадні ў Гродне студэнты задалі Прэзідэнту. У дыскусіі, якая прайшла ў Купалаўскім універсітэце, удзельнічалі студэнты яшчэ дзвюх ВНУ - аграрнай і медыцынскай. Максімум адкрытасці - менавіта на такі фармат зносін нацэліў студэнтаў Кіраўнік дзяржавы. Хто, як не моладзь, распавядзе, чым жыве рэгіён, ды і само пакаленне Z. У выніку размова са студэнтамі атрымалася вельмі грунтоўнай і шчырай. Падрабязнасці ў Вольгі Макей.

У прэзідэнцкім графіку - сустрэчы з моладдзю па некалькі разоў на год. Што хвалюе юных беларусаў, чым цікавяцца, якой бачаць будучыню сваёй краіны. Такія дыскусіі (а фармат - гэта заўсёды жывыя зносіны) часта даюць падставу для даручэнняў Кіраўніка дзяржавы, ды і ў цэлым часам становяцца асновай прыняцця важных рашэнняў.

Так было і ў Гродне. Пачынаючы гутарку, Кіраўнік дзяржавы скажа: "Адна з мэт - абмеркаваць праблемныя пытанні і знайсці рашэнні". На будаўніцтва інтэрната, аб якім вельмі прасілі студэнты, сродкі выдзеляць ужо ў будучым годзе. Прэзідэнт падтрымаў ідэю сеткавых універсітэтаў. Прадумаюць і спрашчэнне паступлення ў ВНУ вучням агракласаў (такая сістэма ўжо дзейнічае ў тых, хто выбраў педагагічны профіль). А вось льготы на праезд у транспарце, пра іх намякнуў адзін са студэнтаў, калі ўвядуць, то адрасна.

Галоўнае, на што нацэльвае беларускі лідар, старанна вучыцца, бо будучыня краіны залежыць ад адукаваных кіраўнікоў, а яшчэ Аляксандр Лукашэнка адкрыта скажа: "Быць паспяховым - гэта вельмі цяжкая праца".

Пытанняў да Прэзідэнта, вядома, шмат. Рэктар Купалаўскага акумулявала самыя папулярныя. На адно з такіх Аляксандр Лукашэнка адказваў даўжэй - усяго 21 хвіліну. На першы погляд, пытанне простае, але разам з тым глыбокае і нават філасофскае.

Гучалі і асабістыя пытанні, хоць Аляксандр Лукашэнка скажа: "У яго працы асабістага не бывае. Жыццё Прэзідэнта ўплеценае ў жыццё дзяржаўнае. Важныя пытанні прыходзіцца прадумваць кожную хвіліну, нават падчас заняткаў спортам, якія абавязкова па дзве гадзіны на дзень".

На памяць аб гэтай душэўнай сустрэчы студэнты падарылі Кіраўніку дзяржавы альбом з гравюрамі гістарычных асоб, звязаных з Гродна. Усім удзельнікам аб гэтай душэўнай гутарцы будзе нагадваць фатаграфія з Прэзідэнтам і, вядома, уражанні, якія застануцца на ўсё жыццё.

У Гродне Аляксандр Лукашэнка наведаў яшчэ некалькі аб'ектаў. Сярод іх - агратурыстычны комплекс "Каробчыцы". Прэзідэнт нагадаў аб гаспадарскім падыходзе да зямлі, а сяло трэба развіваць з разыначкай - шукаць прывабныя фішкі, у тым ліку і ў агратурызме.

У комплексе "Пышкі" гаворка ішла аб развіцці спорту. Тут футбольная і лядовая арэны - гэта паветраапорныя канструкцыі. Не выключана, што такія ж пляцоўкі з'явяцца і ў іншых абласцях, бо невялікія рэгіянальныя школы - кузня кадраў для вялікага спорту. Дарэчы, Прэзідэнт прапанаваў прапрацаваць і сістэму заахвочвання трэнераў за падрыхтоўку добрых гульцоў.