Новы мост пасля рэканструкцыі звязаў Жыткавічы і Тураў

Да свята 7 Лістапада новы мост пасля рэканструкцыі звязаў Жыткавічы і Тураў. Прэзідэнт Аляксандр Лукашэнка прыняў удзел у яго адкрыцці. Каштоўны падарунак зноў аб'яднаў два прамысловыя цэнтры. Адкрываць сацыяльна значныя аб'екты да гэтага дня стала ў нашай краіне традыцыяй, падарункі атрымалі ўсе рэгіёны Беларусі. Хаця сама тэма чырвонага дня ў календары гучыць сёння па-асабліваму. Але Беларусь не імкнецца перапісаць гісторыю, а гаворыць аб уроках той гістарычнай падзеі.

Пакуль мост быў няспраўны, людзям даводзілася пераадольваць 300 кіламетраў аб'езду. Зараз Жыткавічы і Тураў зноў разам. Падчас рэканструкцыі беларускія спецыялісты набылі неацэнны вопыт: выканалі работы за самыя кароткія тэрміны, прымянілі наватарскія ідэі і тэхналогіі. Будаўнікоў і кіраўнікоў, якія стварылі фактычна новы мост цераз Прыпяць, Аляксандр Лукашэнка даручыў прадставіць да ўзнагарод. У найбліжэйшы час будуць вызначаны і іншыя масты, якія патрабуюць першачарговага рамонту.

Падарункам жыхарам Турава і Жыткавічаў стаў таксама святочны канцэрт з удзелам зорак беларускай эстрады.