Аб будучыні спажыўкааперацыі. Прэзідэнт сустрэўся са старшынёй праўлення Белкаапсаюза

Прадоўжыўся рабочы графік Прэзідэнта сустрэчай са старшынёй праўлення Белкаапсаюза. Гаварылі аб будучыні спажыўкааперацыі, у прыватнасці, як праходзіць рэбрэндынг у арганізацыі. Гэта зусім новы сэрвіс і даступнасць паслуг у сельскай мясцовасці, нават у самых аддаленых мясцінах, куды прыватнік асабліва не імкнецца. За гэты год адкрылі 12 пунктаў крокавай даступнасці, 15 сетак харчавання, з'явіліся 9 аўтакрам, мадэрнізаваны больш за 400 гандлёвых аб'ектаў. Зразумела, ёсць і слабыя месцы - выстаяць ва ўмовах жорсткай канкурэнцыі, аптымізацыя штата арганізацыі, што ўплывае на эфектыўнасць працы ў цэлым. Асаблівую ўвагу Прэзідэнт даручыў надаць рабоце з насельніцтвам, у прыватнасці, закупцы плодаагародніннай прадукцыі. Сёлета асабліва высокі ўраджай яблыкаў. Многім неабходная дапамога ў іх рэалізацыі. Да размовы аб будучыні спажыўкааперацыі яшчэ вернуцца. Вялікая нарада запланавана на люты. Пра дэталі сённяшняга дня больш падрабязна Ілона Красуцкая.

У жыхара мегаполіса сёння не ўзнікае ніякіх праблем з выбарам - разнастайнасць гандлёвых цэнтраў, брэндаў, магазінаў, прычым, прама ля дома. Іншая справа, калі жывеш у маленькай вёсачцы. У сельскай мясцовасці паслугі пераважна аказвае Белкаапсаюз. Гэта не толькі гандаль, цэлы комплекс паслуг: нарыхтоўка ягад і гародніны, збор макулатуры, паштовыя паслугі. Белкаапсаюз заняты рэбрэндынгам і нават гатовы саступіць месца прыватніку. Пра новы імідж і праблемы спажыўкааперацыі сёння гаварылі ў Палацы Незалежнасці.

Гаворачы пра рэбрэндынг, першае, што сёння мяняюць кааператары, - стэрэатыпнае ўяўленне аб арганізацыі. У многіх яна асацыіруецца з гэтакім антыіміджам. Але назваць новыя магазіны сеткі Белкаапсаюза сельпо ўжо сапраўды язык не павернецца.

Пункты Белкаапсаюза сёння ёсць у кожным з 1 420 аграгарадкоў краіны і нават у самых аддаленых вёсках, дзе насельніцтва і зусім меншае за 50 чалавек. А пакупнік на сяле не менш патрабавальны, чым гарадскі - патрэбная і прыгожая выкладка, і даступны сэрвіс, і сучасны дызайн, магчымасць расплаціцца пластыкавымі карткамі.

Сёлета Белкаапсаюз адкрыў 12 пунктаў крокавай даступнасці, з'явіліся 9 аўтакрам, апгрэйду дачакаліся 4 сотні гандлёвых аб'ектаў. А яшчэ плюс 15 фірменных сетак харчавання.

Некалькі гадоў таму сярод іншых аб'ектаў прыдарожнага сэрвісу гэты не карыстаўся асаблівай папулярнасцю. Прыхапіўшы некалькі бутэрбродаў, вадзіцель збіраўся ў дарогу. Сёння тут прыемны водар кавы і выпечкі на любы густ, Wi-Fi і ўтульны інтэр'ер.

Гэтае кафэ на трасе Мінск - Мікашэвічы адным з першых трапіла ў своеасаблівую праграму рэнавацыі Белкаапсаюза. Да канца года па такім стандарце будзе пераабсталявана больш чым сто пунктаў грамадскага харчавання. Безумоўна, у Белкаапсаюза ёсць і праблемы. Дзесьці скача цана, але калі паглядзець, кошт стандартнага кошыка пакупніка часта ніжэйшы, чым у прыватніка. Дзесьці ёсць пытанні з якасцю абслугоўвання, але яны не закрытыя і ў сталіцы. Так, больш за 90 % з таго, што прапаноўвае спажыўсаюз, - беларускае, але сёлета абяцаюць выканаць запыты пакупнікоў. На прылаўках будзе і імпарт. І ўсё гэта ва ўмовах жорсткай канкурэнцыі. У Палацы Незалежнасці сёння якраз і гаварылі аб павышэнні канкурэнтаздольнасці і далейшых пераменах у арганізацыі. Прэзідэнт прапаноўвае чатыры месяцы на тое, каб зрабіць рэвізію ўсіх паслуг, аб'ектыўна паглядзець, якія з іх сёння запатрабаваныя, а якія можна перадаць прыватніку. Да размовы аб будучыні спажыўкааперацыі яшчэ вернуцца на ўзроўні Прэзідэнта - вялікая нарада запланавана на люты. Сёння прыватнік актыўна ідзе ў абласныя, раённыя цэнтры. Але вось туды, дзе жыве ўсяго 30-40 чалавек, відавочна, не спяшаецца. Для Белкаапсаюза такая манаполія не прыносіць ніякага эканамічнага эфекту, толькі страты - штогод 18 мільёнаў рублёў. Але трэба разумець: зачыніць гэтыя магазіны немагчыма, таму што будуць чакаць усё тыя ж 30-40 чалавек. Затое адзін з выйгрышных артыкулаў - работа з насельніцтвам. Арганізацыя закуплівае больш чым 30 відаў сельгаспрадукцыі і сыравіны. Сёлета спажыўкааперацыя плануе нарыхтаваць не менш чым 100 тысяч тон яблыкаў. Нягледзячы на тое што цана за кілаграм садавіны невялікая - 5 капеек, у сярэднім з адной яблыні за сезон выходзіць крыху менш чым паўтоны. З дапамогай нескладаных вылічэнняў атрымліваецца прыстойная сума фактычна паднятая з зямлі.

У Белкаапсаюза ёсць дамоўленасці аб прыёме ўраджаю з усімі дзяржаўнымі і прыватнымі перапрацоўчымі прадпрыемствамі, заключаюцца пагадненні і з гандлёвымі сеткамі. Усё самае смачнае і карыснае - нашы сокі, пюрэ, варэнне - неўзабаве з'явіцца на паліцах магазінаў. І калі тут у арганізацыі няма роўных, чаму б не рабіць стаўку менавіта на гэты напрамак.

Кіраўнік праўлення Валерый Іваноў скажа журналістам: яны б і рады саступіць месца прыватнікам, толькі прапаноў пакуль нуль. Прэзідэнт сёння запэўніў: Белкаапсаюзу быць. Размова хутчэй ідзе аб поўным перафармаціраванні яго працы. Трэба паглядзець на ўсе нюансы: ад колькасці штату да якасці і колькасці паслуг.

Новы імідж - значыць, новы сэрвіс, асартымент тавараў і даступнасць паслуг, асабліва ў сельскай мясцовасці. Для таго каб звярстаць план перамен, для абмеркавання на вышэйшым узроўні ў спажыўкааперацыі ёсць яшчэ 4 месяцы. А вось каб паказаць сябе па-сталічнаму ва ўсёй красе - толькі 20 дзён. 11 лістапада ля Палаца спорту пройдзе кірмаш прадпрыемстваў Белкаапсаюза. А з улікам таго, колькі тысяч людзей прыходзіць сюды па сваё, беларускае, будучыня арганізацыі сапраўды гарантаваная.