Ад працы прадпрыемстваў да міжнароднага супрацоўніцтва - такі спектр тэм абмяркоўвалі сёння на нарадзе Прэзідэнта з кіраўніцтвам Савета Міністраў.

Сустрэча з эканамічным блокам урада з'яўляецца традыцыйнай. Практыка прамога дыялогу па сістэмных пытаннях паказала сваю эфектыўнасць. На парадку абмеркавання пакет законапраектаў, які будзе спрыяць паляпшэнню інвестыцыйнага клімату і вядзення бізнесу. Улічваючы, што дакументы закранаюць шырокае кола інтарэсаў, на нараду былі запрошаныя кіраўнікі парламента, Камітэта дзяржкантролю, Адміністрацыі Прэзідэнта і некаторых дзяржорганаў.

Што тычыцца павышэння эфектыўнасці працы прадпрыемстваў, пазіцыя Аляксандра Лукашэнкі нязменная. Калі дзяржава аказвае падтрымку, то мае права разлічваць на вынік і на выкананне ўзятых абавязацельстваў. Кантраляваць тэрміны вяртання сродкаў у такіх выпадках - даручэнне Дзяржкантролю і Адміністрацыі Прэзідэнта.

Аляксандр Лукашэнка нагадаў аб прынцыповым пытанні - адказнасці не толькі кіраўнікоў, але і ўрада. У гэтым сэнсе ёсць пазітыўныя прыклады, напрыклад, праца прадпрыемства "Гомельшкло". Пасля таго як заводу падставілі плячо, удалося выйсці па выніках 2018 на рэнтабельную працу. А вось магчымыя меры па цэментных заводах (абмяркоўвалася сітуацыя ў галіне) - гэта яшчэ пытанне, урад прапануе варыянты.

Па выніках нарады першы віцэ-прэм'ер таксама паведаміў, што ў найбліжэйшы час чакаецца прыняцце дакументаў, накіраваных на далейшае паляпшэнне дзелавога клімату і павышэнне інвестыцыйнай прывабнасці Беларусі.

Што тычыцца супрацоўніцтва па міжнароднай лініі, то на нарадзе таксама разглядаліся пытанні ў сферы мытнага ўзаемадзеяння на прасторы СНД, якія аблегчаць працу і кантакты мытных органаў, а таксама ў цэнтры ўвагі было супрацоўніцтва з міжнароднымі фінансавымі структурамі. Размова пра фінансаванне Еўрапейскім банкам рэканструкцыі і развіцця праектаў у ЖКГ.