Адносіны Беларусі і Ірана выйшлі на якасна новы ўзровень развіцця

Такую ацэнку па выніках сустрэчы ў Палацы Незалежнасці з кіраўніком Сходу ісламскага савета Ірана Алі Ларыджані выказаў Прэзідэнт Беларусі Аляксандр Лукашэнка. А таму перспектыва выхаду ўзаемнага тавараабароту на адзнаку ў мільярд долараў цалкам ажыццявімая. Тым больш што ў дасягненні амбіцыйнай задачы па нарошчванні ўзаемнага тавараабароту краінам пачынаць з нуля не прыходзіцца. Моцны падмурак - гэта чвэрцьвекавая дыпламатыя і пастаянныя кантакты на ўсіх узроўнях, якія і прыносяць бонус узаемнаму гандлю. Больш за тое, сёння краіны не маюць намеру абмяжоўвацца рамкамі простага гандлю. Іран цікавіць сфера высокіх тэхналогій. Партнёры гатовыя пераймаць беларускі досвед. Наша краіна, у сваю чаргу, зацікаўленая ў іранскіх інвестыцыях.

Камінная зала Палаца Незалежнасці ў год прымае каля 300 мерапрыемстваў. Як правіла, Кіраўнік беларускай дзяржавы сустракае тут замежных гасцей. Усе інтэр'еры добра знаёмыя сённяшняму госцю - з чарговым візітам у Мінску спiкер парламента Ірана. Нягледзячы на адлегласць амаль 4 тысячы кіламетраў, блізкасць кантактаў паміж краінамі адзначаецца на ўсіх узроўнях. Дарэчы, супрацоўніцтва асабліва апошнія гады паказвае добры тэмп. Але гаворачы пра эканоміку на мове вялікай палітыкі, можна куды больш. Пра новыя саюзніцкія праекты і будучыя кантакты Мінска і Тэгерана сёння і ішла размова.

Так Алі Ларыджані паціскаў руку беларускаму Прэзідэнту 4 гады таму. На пасадзе кіраўніка парламента Ірана ён ужо 10 гадоў. У прэсе прозвішча спікера пастаянна фігуруе і падчас візітаў беларускіх дэлегацый на тэгеранскую тэрыторыю. Аб тым, што Ларыджані рады гэтай сустрэчы, сама за сябе гаворыць яго эмацыянальнасць і яшчэ адзін факт, які трапіў у аб'ектывы камер. Насуперак правілам пратакола госць пачынае размову першым.

Самае галоўнае, на шляху да гэтай мэты краінам пачынаць з нуля не прыходзіцца. Ёсць добры зачын. Дыпламатыі Мінска і Тэгерана ўжо больш за чвэрць стагоддзя. Аляксандр Лукашэнка двойчы наведваў Іран. І столькі жа разоў у Беларусь ажыццяўляліся візіты ў адказ.

Кіраўнікі дзяржаў, у тым ліку, сустракаюцца на палях самітаў БРІКС і Шанхайскай арганізацыі супрацоўніцтва. Адны з нядаўніх перамоў адбыліся ў чэрвені ў кітайскім Ціндаа.

Летась тавараабарот паміж краінамі перавысіў 150 мільёнаў долараў. Але лічба імкліва паказвае рост і сёлета. Пазітыўна ўплывае супрацоўніцтва ў рамках ЕАЭС, з аб'яднаннем у Ірана дзейнічае часовае пагадненне аб зоне свабоднага гандлю. Беларусь экспартуе ў Іран грузавыя аўтамабілі, запчасткі да іх, шыны, медтэхніку. Аснова іранскага экспарту - сухафрукты, арэхі і лекі.

Прыйшоў час перагледзець прыярытэты, не абмяжоўваючыся толькі простым гандлем. Сёння Іран цікавіць сфера высокіх тэхналогій, і партнёры гатовыя пераймаць перадавы беларускі вопыт менавіта ў гэтай галіне. Беларусь у сваю чаргу зацікаўленая ў іранскіх інвестыцыях. Сёння ў Палацы Незалежнасці закрытых тэм не было. Ды і гэтая зусім іншая якасць дыялогу, калі выкананне праектаў гарантуе сам Прэзідэнт.

Зрэшты, падтрымку краіны аказвалі адна адной і ў самыя складаныя часы. Да таго ж на фоне санкцый Вашынгтона і іншых пагроз афіцыйны Тэгеран сёння мае патрэбу ў міжнароднай падтрымцы ад саюзнікаў і партнёраў.

Таму Беларусь, як адзіная дзяржава Шанхайскай ініцыятывы ў цэнтры Еўропы, набывае для Ірана асаблівае значэнне.

Дэлегацыя сёння сустрэлася і са сваімі беларускімі калегамі - спікерамі Палаты прадстаўнікоў і Савета Рэспублікі. Дарожная карта супрацоўніцтва паміж краінамі звярстана на найбліжэйшыя два гады. Такая ж з'явіцца і па лініі міжпарламенцкага ўзаемадзеяння. Нададуць увагу не толькі абмену вопытам, заканадаўчай дзейнасці, але і развіццю дамоўна-прававой базы. Краіны маюць намер узмацніць супрацоўніцтва і ў транспартна-лагістычнай сферы. Актыўнасць праектаў і кантактаў па лініі Мінск - Тэгеран сапраўды назіраецца на ўсіх узроўнях. У найбліжэйшы час прапрацоўваецца візіт у Мінск першага віцэ-прэзідэнта Ірана. Ён курыруе эканамічны блок урада і фактычна выконвае абавязкі прэм'ер-міністра. А вось візіт парламенцкай дэлегацыі трохдзённы. Госці яшчэ плануюць наведаць некалькі прамысловых прадпрыемстваў нашай краіны.