Ажывіць эканоміку Аршанскага рэгіёна дапаможа авіярамонтны завод

Неадкладнае вывядзенне Аршанскага авіярамонтнага завода на стабільную працу з перадачай яго ў структуру дзяржваенпрама. А таксама паэтапнае развіццё Аршанскага рэгіёна як найбуйнейшага прамыслова-лагістычнага цэнтра на ўсходзе Беларусі. Такія стратэгічныя задачы сёння паставіў Кіраўнік дзяржавы, калі наведваў прадпрыемства і перспектыўную інвестыцыйную пляцоўку. Галоўныя праблемы завода сёння - вельмі высокая закрэдытаванасць, дэфіцыт імпартных запчастак і невыкананне інвестарам абавязацельстваў. Адгэтуль нізкія зарплаты, нерытмічная праца па заказах і цяжкае фінансавае становішча. Пры гэтым, адзначыў беларускі лідар, сусветны парк машын, якія абслугоўвае аршанскі завод, такі вялікі, што пры правільным развіцці нашы рамонтнікі здольныя нават пашырыць нішу на рынку.

У Аршанскага авіярамонтнага ўжо ёсць стратэгія паэтапнага выхаду з крызісу без удзелу нядобрасумленнага інвестара. Яна ўключае ў сябе будаўніцтва і рэканструкцыю ўласнай механічнай, тэрмічнай і гальванічнай вытворчасцяў плюс уласны цэх гумава-тэхнічных вырабаў. Гэта дазволіць не залежаць ад імпарту запасных частак і камплектуючых. Таксама знізіць цяжар крэдытаў дапамогуць кантракты, якія завод ужо выконвае. Іх геаграфія ахоплівае краіны Еўропы, Лацінскай Амерыкі, Афрыкі, вялікага Блізкага Усходу і Персідскага заліва. У прыватнасці, знакамітыя лятаючыя танкі Мі-24, якія прайшлі глыбокую беларускую мадэрнізацыю.

Паведамілі Прэзідэнту і пра рэалізацыю буйнога прыватнага інвестпраекта па будаўніцтве прамыслова-лагістычнага цэнтра ў Балбасаве. Праект разлічаны да 2023 года і мяркуе замкнуць дзеючы чыгуначны вузел у Оршы, два міжнародныя аўтакалідоры Захад - Усход і Поўнач - Поўдзень плюс падлучыць узлётную паласу авіярамонтнага завода. Сёння яна ў крытычным стане, пакрыццё зношанае і прымаць у асноўным можа толькі верталёты. Прэзідэнт паставіў задачу да канца восені вярнуць гавані здольнасць прымаць паветраныя судны любой спецыялізацыі, у першую чаргу транспартнай.

Жорсткая задача - да 7 лістапада навесці ідэальны парадак у Балбасаве. Ад дарог да вадаправода і газіфікацыі. Плюс прывесці ў парадак і адрамантаваць жыллё. Тут важную ролю павінны сыграць і мясцовыя жыхары. Прэзідэнт паабяцаў асабіста прыехаць у гэты населены пункт увосень і прыняць працу.