Першы даклад новага прэм'ер-міністра Прэзідэнту Беларусі

Праект прагнозу развіцця Беларусі, бюджэт і асноўныя кірункі грашова-крэдытнай палітыкі на 2019 год падрыхтаваныя абноўленым складам урада і праходзяць фінішныя ўзгадненні.

Пра гэта сёння Прэзідэнту далажыў прэм'ер-міністр Сяргей Румас. Кіраўнік дзяржавы адзначыў, што яго ў першую чаргу цікавіць развіццё эканамічных працэсаў з улікам няпростых знешніх і ўнутраных выклікаў і іх уплыў на фінансавае здароўе беларускай эканомікі. Таксама Прэзідэнт пацікавіўся пазіцыяй старшыні ўрада наконт вёрсткі перспектыўных бюджэтаў на тэрмін да пяці гадоў і мадэрнізацыі самой структуры Кабінета міністраў пасля абнаўлення.

Як адзначыў кіраўнік урада, усе планавыя паказчыкі на бягучы і наступны гады, у тым ліку па росце ВУП і ў сферы фінансаў, будуць выкананыя. Савет Міністраў бачыць рэзервы не толькі для паскарэння тэмпаў росту эканомікі ў другім квартале бягучага года, але і для перавышэння прагнозу ў ключавых паказчыках. Пры гэтым адным з галоўных фактараў запаволення стала паслабленне расійскага рубля і нявырашанасць прынцыповых для Беларусі пазіцый. Сярод іх - пастаўкі сырой нафты, рэфінансаванне часткі доўгу і атрыманне еўразійскіх крэдытных рэсурсаў. Ва ўрадзе разлічваюць прыйсці да пагаднення з расійскімі калегамі на працягу двух тыдняў.

Пакуль не знятыя з Сяргея Румаса і пытанні развіцця гульні нумар 1 - беларускага футбола. Лідар папытаў кіраўніка ўрада папрацаваць у федэрацыі да канца кадэнцыі - гэта сакавік-красавік наступнага года. Таксама лідар крануў і яшчэ адну актуальную спартыўную тэму - падрыхтоўку да Еўрапейскіх гульняў. Змагацца з гаспадаром першага форуму - Азербайджанам - у аб'ёме выдаткаў на правядзенне форуму не варта. Беларусы павінны ўзяць душэўнасцю і найвышэйшым узроўнем арганізацыі, падкрэсліў Аляксандр Лукашэнка.

У дакладзе Прэзідэнту Сяргей Румас адзначыў, што абноўлены склад урада пачаў працу без прамаруджання, і сёння ўся структура Савета Міністраў працуе ў штатным рэжыме. А што датычыцца яе абнаўлення, дык, на погляд прэм'ера, 36 членаў урада для невялікай краіны шмат, але па даручэнні Прэзідэнта гэтае пытанне патрабуе дадатковай дбайнай распрацоўкі.