Віншаванне народнаму артысту Беларусі Віктару Манаеву

Прэзідэнт Беларусі Аляксандр Лукашэнка павіншаваў народнага артыста Беларусі Віктара Манаева з 60-годдзем.

"Сваёй плённай творчай дзейнасцю Вы заваявалі любоў і павагу ўдзячных гледачоў. Кожная пастаноўка з Вашым удзелам уражвае высокім узроўнем прафесіяналізму, прываблівае глыбінёй, выразнасцю і душэўнай адкрытасцю, пакідае незабыўныя ўражанні ў сэрцах шматлікіх прыхільнікаў", - гаворыцца ў віншаванні.

Аляксандр Лукашэнка адзначыў, што ўнёсак Віктара Манаева ў стварэнне, захаванне і папулярызацыю традыцый нацыянальнай тэатральнай школы з'яўляецца прыкладам для маладых артыстаў, сапраўдным гонарам славутай Купалаўскай сцэны і ўзорам шчырага служэння сваёй краіне. "Упэўнены, што Ваша бязмежная адданасць мастацтву і далей будзе спрыяць росквіту беларускай культуры", - падкрэсліў Кіраўнік дзяржавы.

Прэзідэнт пажадаў Віктару Манаеву моцнага здароўя, невычэрпнай энергіі, натхнення, шчасця і дабрабыту.