Прэзідэнт Беларусі павіншаваў вайскоўцаў 52-га пошукавага батальёна з 30-годдзем падраздзялення

Прэзідэнт Беларусі Аляксандр Лукашэнка павіншаваў асабовы склад і ветэранаў 52-га асобнага спецыялізаванага пошукавага батальёна з 30-годдзем з дня ўтварэння падраздзялення. Пра гэта паведамляе БЕЛТА.

"Унікальнае падраздзяленне Узброеных Сіл Рэспублікі Беларусь сёння выконвае важныя дзяржаўныя задачы па пошуку і ўвекавечанні памяці воінаў, якія загінулі ў баях за Радзіму. Важна, што, вяртаючы з нябыту імёны герояў, вы даеце магчымасць сваякам даведацца пра лёс сваіх блізкіх", - гаворыцца ў віншаванні.

Аляксандр Лукашэнка адзначыў, што неацэнны ўклад батальёна і ў расследаванне фактаў генацыду беларускага народа ў гады Вялікай Айчыннай вайны, а таксама патрыятычнае выхаванне моладзі на прыкладзе подзвігаў пакалення пераможцаў.

"Перакананы, што тая вялікая работа, якую воіны-пошукавікі праводзяць па ўвекавечанні памяці абаронцаў Радзімы, - гэта выказванне ўдзячнасці і выкананне святога абавязку беларускага народа перад продкамі, якія ахвяравалі сваімі жыццямі дзеля нашай свабоды", - падкрэсліў Прэзідэнт.

Кіраўнік дзяржавы пажадаў асабоваму складу і ветэранам батальёна добрага здароўя, шчасця, дабрабыту, мірнага неба над галавой і новых поспехаў у ратнай працы на карысць Рэспублікі Беларусь.