Прэзідэнт: Беларусь заўсёды будзе добрым і надзейным сябрам Арменіі

Пытанні глабальнай бяспекі зноў абмяркоўваюць у Мінску. У гэтыя дні беларуская сталіца ўпершыню стане пляцоўкай для правядзення аўтарытэтнай сустрэчы асноўнай групы Мюнхенскай канферэнцыі. Галоўнае, што будуць абмяркоўваць больш як 70 дэлегатаў з розных краін (а гэта прэзідэнты, кіраўнікі ўрадаў і знешнепалітычных ведамстваў), гэта адносіны па лініі Усход - Захад. Зрэшты, і Усход, і Захад Мінску давяраюць. А за ўклад ва ўмацаванне бяспекі ў рэгіёне выбіраюць месцам сустрэчы менавіта нашу краіну. Канструктыўную ролю Мінска высока ацэньваюць і ў Ерэване. Зрэшты, Аляксандр Лукашэнка сёння падчас сустрэчы з прэзідэнтам Арменіі пацвердзіў: Беларусь заўсёды будзе добрым і надзейным сябрам. У Палацы Незалежнасці абмяркоўвалі двухбаковыя адносіны, а таксама міжнароднае становішча. Армен Саркісян падкрэсліў важную ролю Беларусі ў вырашэнні канфліктаў: мінская пляцоўка, паводле яго слоў, вызначаецца стабільнасцю і прадказальнасцю, дзе рэгулярна і паспяхова вырашаюцца самыя розныя міжнародныя праблемы. Адзін з прыкладаў - Мінская група АБСЕ, якая займаецца пошукам шляхоў мірнага ўрэгулявання карабахскага канфлікту. Працягне Вераніка Бута.

Беларусь як міжнародная пляцоўка па вырашэнні канфліктаў і крызісаў сябе ўжо зарэкамендавала. Афіцыйнаму Мінску, які ўжо столькі гадоў уносіць свой уклад ва ўмацаванне стабільнасці і бяспекі ў рэгіёне, давяраюць. Беларуская сталіца ўсё часцей становіцца камфортнай платформай для дыялогу. Усім вядомыя мінскія пагадненні, перамовы па лініі АБСЕ. Сёлета Мінск нароўні з найбуйнейшымі геапалітычнымі цэнтрамі прымае і асноўную групу Мюнхенскай канферэнцыі па бяспецы.

Гаспадарамі гэтага форуму ўжо былі Вашынгтон, Пекін і іншыя сталіцы глабальных сусветных ігракоў. Зараз такое права за Мінскам. Афіцыйнае адкрыццё сустрэчы адбудзецца заўтра, а сёння ў сталіцу актыўна прыбываюць удзельнікі канферэнцыі, сярод іх - кіраўнікі дзяржаў і ўрадаў.

Удзел у сустрэчы асноўнай групы Мюнхенскай канферэнцыі для Армена Саркісяна яшчэ і выдатная магчымасць абмеркаваць двухбаковыя адносіны Беларусі і Арменіі. Сёння ў Палацы Незалежнасці - першая асабістая сустрэча прэзідэнтаў.

Армен Саркісян шчыра сказаў, ён рады таму, што менавіта ў Беларусі адбудзецца размова аб міры і бяспецы. Бо складана ўявіць на карце месца больш прыдатнае для абмеркавання такіх пытанняў. Наша пляцоўка ўжо заваявала аўтарытэт і давер на глабальнай палітычнай карце. Тут рэгулярна вырашаюцца самыя розныя міжнародныя праблемы - ад канфліктаў у нашых суседзяў да пытанняў кіберзлачыннасці. Успомнілі і Мінскую групу АБСЕ. З пачатку 90-х з яе дапамогай вядуцца перамовы па мірным урэгуляванні карабахскага канфлікту. Сёння вобраз Беларусі - гэта вобраз стабільнасці.

На пасадзе прэзідэнт Арменіі з красавіка гэтага года. Вясной дзяржава Закаўказзя перажывала няпросты перыяд пераходу да парламенцкай формы кіравання, краіну ахапілі акцыі пратэсту. Беларусь не засталася абыякавай. Пасля тэлефоннай гутаркі двух прэзідэнтаў у Ерэван па просьбе Аляксандра Лукашэнкі вылецелі беларускія журналісты, якія ў штодзённым рэжыме асвятлялі тыя няпростыя падзеі.

Арменія і Беларусь - партнёры па цэлым шэрагу інтэграцый. У эканамічных пытаннях супрацоўнічаем па лініі ЕАЭС, у пытаннях ваенна-палітычных - у рамках АДКБ. Актыўна ідзе праца ў фармаце СНД. Нягледзячы на перамены ўнутры краіны, вектары знешнія застануцца ранейшымі. У гэтым прэзідэнт Арменіі запэўніў журналістаў у тым самым красавіцкім інтэрв'ю.

Узаемны гандаль паміж нашымі краінамі штогод дадае. Сёлета тавараабарот ужо вырас на трэць (за 8 месяцаў у агульнай скарбонцы 31 млн. долараў). Прычым вялікая частка - гэта беларускі экспарт. У асноўным прадаем трактары, малочныя прадукты і мэблю. Аднак патэнцыял значна вышэйшы, адзначыў беларускі лідар.

Цікавасць у першую чаргу да сферы новых тэхналогій, уключаючы навуку і IT. Яно і зразумела, з аднаго боку - павевы часу, з другога - цікавасць асабістая. Прэзідэнт Арменіі па адукацыі фізік. Упершыню Армен Саркісян наведаў Акадэмію навук Беларусі яшчэ маладым навукоўцам у 1976 годзе - удзельнічаў у працы міжнароднай канферэнцыі. А сёння ўжо на новай пасадзе абмеркаваў магчымыя беларуска-армянскія навуковыя праекты: чакаюць сумесных адкрыццяў у галіне лічбавых і лазерных тэхналогій, кібербяспекі, ядзернай энергіі і фармацэўтыкі.

Яшчэ адзін перспектыўны кірунак - гэта харчовая прамысловасць. Мінск і Ерэван могуць не толькі ўзаемадзейнічаць паміж сабою, але выходзіць з вырабленай прадукцыяй на рынкі іншых краін. Сёння попыт на тавары, зробленыя ў Беларусі, у Арменіі высокі. Купляюць і прадукты харчавання, і нашу тэхніку. Тут прадстаўленыя больш як 80 беларускіх прадпрыемстваў. Да прыкладу, армяна-беларускі гандлёвы дом забяспечвае пятую частку беларускага экспарту на гэты закаўказскі рынак. Акрамя таго, Ерэван зацікаўлены ў нашым наземным транспарце - сотні аўтобусаў і тралейбусаў маюць патрэбу ў замене, і Беларусі ёсць што прапанаваць.

Зрэшты, падмурак для развіцця супрацоўніцтва - і добрыя адносіны паміж народамі. А яшчэ, як скажа прэзідэнт Арменіі, высокі аўтарытэт Аляксандра Лукашэнкі ў яго краіне. Паважаюць і давяраюць, а гэта таксама немалаважна для дыялогу Мінска і Ерэвана.

Менавіта дзякуючы даверу да Беларусі з боку сусветнай супольнасці пытанні міру і справядлівасці зноў будуць вырашаць у беларускай сталіцы. Ужо заўтра і Аляксандр Лукашэнка, і Армен Саркісян ізноў сустрэнуцца, але ўжо ў значна шырэйшым фармаце і на палях найбуйнейшага міжнароднага форуму - пасяджэння асноўнай групы Мюнхенскай канферэнцыі па бяспецы. Дзе ўсе разам (прэзідэнты, міністры замежных спраў, кіраўнікі міжнародных арганізацый) паспрабуюць ізноў вярнуць давер, які так імкліва губляюць Усход і Захад.