Прэзідэнт Беларусі наведаў абноўлены Балбасава

Лістападаўскія дні - час падарункаў для беларусаў. Напярэдадні 7 Лістапада ў розных кутках краіны па традыцыі з'яўляюцца новыя аб'екты і абнаўляюцца старыя - бо так важна захоўваць лепшае. Прыклад таму - пасёлак Балбасава Аршанскага раёна, які атрымаў новае аблічча. Зрабіць гэтае месца камфортным і зручным для жыцця яшчэ ўлетку даручыў Прэзідэнт. Сёння тут чыстая вада, роўныя дарогі і пешаходныя дарожкі, абноўленыя школа, бальніца і Дом культуры. А яшчэ - вялікае жаданне берагчы тое, што зроблена, і працягваць ужо ўласнымі сіламі ўпрыгожваць малую радзіму.

Сёлета Балбасава адзначае 90-годдзе. Праўда, доўгі час на карце Аршанскага раёна такога населенага пункта не было. У савецкія гады тут знаходзіўся полк далёкай авіяцыі. Ваенны гарадок быў засакрэчаны, назвы не меў. Толькі парадкавы нумар 20.

Расказвае Вольга Маслоўская. У дзевяностыя часць расфарміравалі. Ваенны шпіталь стаў участковай бальніцай, Дом афіцэраў - Домам культуры. Старажылы ўспамінаюць: апошнія гастролі на яго сцэне былі гадоў ажно 25 таму. Спявалі "Блакітныя бярэты". З тых часоў - аднастайнае і не вельмі святочнае жыццё. Прэзідэнт пабываў тут мінулым летам. Тады сказаў: "Балбасава - шыкоўнае месца для жыцця". І калі патрэбныя ўкладанні, каб раскрыць патэнцыял гэтага кутка беларускай зямлі, дзяржава дапаможа. Апошнія паўгода пасёлак нагадваў вялікую будпляцоўку. У працы былі адразу некалькі дзясяткаў аб'ектаў: школа, бальніца, жылыя дамы, двары. Прэзідэнт прыехаў асабіста, каб паглядзець, што атрымалася! Такія пасёлкі - узор, паводле якога ў наступныя гады прывядуць у парадак усе ў краіне.

У пасёлку з'явіліся тратуары. Яны былі далёка не на ўсіх вуліцах. А гэта бяспека і дарослых, і дзяцей. Але малышы зараз больш радуюцца вось такім яркім сучасным гульнявым пляцоўкам. Адрамантаваная школа. Сёння тут шклопакеты, сучасная спартзала, утульныя кабінеты. Абнавілі бальніцу, завезлі новае абсталяванне. Сучасны ДК - з камфортнымі крэсламі ў зале для гледачоў, рэпетыцыйнымі пакоямі і нават фітнес-цэнтрам. Нададзена ўвага жылому фонду: адрамантавана больш за два дзясяткі будынкаў. Але самы доўгачаканы аб'ект - станцыя абезжалезвання.

Завяршаць добрую справу да лістападаўскіх свят - традыцыя, ад якой Беларусь не адмовілася. А ўладкаванне Балбасава - менавіта такая вялікая справа для малой радзімы.

Пра тое, як многа для іх значаць высілкі па ўладкаванні пасёлка, мясцовыя жыхары гавораць Прэзідэнту. Балбасаўцы не чакалі такой пільнай увагі да іх радзімы.

Прывесці ў парадак - паўбяды, трэба ствараць рабочыя месцы. З буйных вытворчасцяў у Балбасаве авіярамонтны завод. Туды Прэзідэнт накіроўваецца, каб праверыць ход выканання яшчэ аднаго даручэння - рэканструкцыі ўзлётна-пасадачнай паласы. Сёння яна ў крытычным стане, пакрыццё знасілася і здольна прымаць толькі верталёты. А задача - працаваць з рознымі класамі паветраных суднаў. Тым больш што зусім побач ідзе будаўніцтва буйнога прамыслова-лагістычнага цэнтра.

Размяшчэнне вытворчасцяў па апрацоўцы сыравіны, кароткатэрміновае і доўгатэрміновае захоўванне тавараў, перавалка транзітных грузаў з Азіі ў Еўропу па чыгунцы, паветры і аўтатрасамі - гэта толькі частка магчымасцяў будучага мультымадальнага цэнтра. Беларускі інвестар разлічвае завяршыць праект да 2023 года. Але ўжо ў студзені 2019 пачне працаваць першая чарга, а гэта значыць, будуць працаўладкаваныя 60 спецыялістаў. І ў першую чаргу гэта жыхары Балбасава.

У наступныя дні падарункі чакаюць у іншых рэгіёнах Беларусі. Сёння свае дзверы расчыняць дзіцячы сад у Іўі, гасцінічны комплекс у Гродне. Сталічныя артысты вернуцца ў будынак тэатра "Мінск-канцэрт" пасля рэканструкцыі. Аб усіх гэтых і іншых знакавых аб'ектах мы распавядзем у нашых выпусках навін.