Прэзідэнт Беларусі правёў сустрэчу з сакратаром Савета бяспекі Узбекістана

Беларусь і Узбекістан усяго за некалькі гадоў ва ўзаемных адносінах прайшлі шлях, які раней не атрымлівалася прайсці два дзесяцігоддзі. Пры гэтым сумесны парадак дня знаходзіцца ў трэндзе выдатных адносін афіцыйнага Ташкента як з Усходам, так і з Захадам.

Пра гэта сёння заявіў Прэзідэнт Беларусі на сустрэчы з сакратаром Савета бяспекі пры прэзідэнце Узбекістана Віктарам Махмудавым. Кіраўнік дзяржавы падкрэсліў, што новая якасць супрацоўніцтва абапіраецца на пагадненні, дасягнутыя на ўзроўні лідараў дзвюх краін у рамках нядаўняга вераснёвага афіцыйнага візіту ва Узбекістан. Менавіта тады было прынята рашэнне сфарміраваць і ўзяць на кантроль падрабязную дарожную карту ва ўсіх кірунках узаемадзеяння. Візіт сакратара Савета бяспекі Узбекістана якраз і напаўняе рэальным зместам вялікі блок ваенна-тэхнічнага супрацоўніцтва краін.

План узаемадзеяння ў ваенна-тэхнічнай сферы на наступныя два гады ўключае ў сябе падрыхтоўку кадраў, істотную мадэрнізацыю ваеннай тэхнікі Узбекістана сіламі беларускага ВПК. Акрамя таго, афіцыйны Ташкент выказвае цікавасць і да перадавых распрацовак беларускага абароннага комплексу. У прыватнасці, гаворка ідзе пра сістэмы залпавага агню "Паланэз", лёгкую бранятэхніку "Кайман" і беспілотнікі.