Прэзідэнт Беларусі ставіць задачы на семінары-нарадзе па будаўнічым комплексе

Павышэнне эфектыўнасці будаўнічай галіны Беларусі. Гэта галоўная тэма маштабнай дыскусіі ў рамках рэспубліканскага семінара, удзел у якім бярэ Прэзідэнт.

У Палац Незалежнасці запрасілі каля 250 чалавек. Гэта кіраўнікі профільных прадпрыемстваў, галіновай прамысловасці, губернатары і ўрад. Сустрэчы ў такім фармаце праводзіліся не раз і даказалі сваю эфектыўнасць. Такое абмеркаванне праблем і рашэнні для іх на ўзроўні Кіраўніка дзяржавы дэталёва разглядалі ў ЖКГ і аграпрамысловым комплексе. На гэты раз уся ўвага сканцэнтраваная на адной з ключавых галін, якая так ці інакш датычыцца кожнага беларуса. Для развіцця было зроблена нямала. Прынцыпова новыя правілы працы ў будаўнічай галіне (адказнасць, патрабаванні да ўсіх удзельнікаў будаўнічага працэсу) рэгламентаваў прэзідэнцкі ўказ. Сёлета назіраецца рост асноўных паказчыкаў, але ў цэлым аб станоўчай дынаміцы гаварыць не прыходзіцца. За апошнюю пяцігодку зменшыўся ВУП, назіраецца падзенне аб'ёмаў падрадных работ і ўзвядзення жылля, да таго ж адвечныя праблемы даўгабудаў, прыклады карупцыі. Сёння падчас семінара-нарады Кіраўнік дзяржавы даў шэраг прынцыповых даручэнняў. Яны датычацца ключавых пытанняў цаны, якасці і тэрмінаў будаўніцтва.

Патрабаванне Прэзідэнта адрасавана губернатарам і мэру сталіцы - узяць пад асабісты кантроль і завяршыць будаўніцтва ўсіх дамоў-даўгабудаў. Крайні тэрмін - першая палова 2019 года. Прычыны, па якіх 35 дамоў дагэтуль не ўведзены ў строй, правераць КДК і Генпракуратура. Адно з найважнейшых пытанняў - кошт квадратнага метра. Для ўрада ў прыярытэце застаецца формула "адзін квадратны метр з дзяржпадтрымкай не вышэй за сярэднюю зарплату па краіне". Пры гэтым дасягненне яе ўзроўню ў тысячу рублёў не значыць, што метр павінен каштаваць столькі ж. Асобнае даручэнне Кіраўніка дзяржавы датычыцца падтрымкі шматдзетных сем'яў. Большасць з іх па-ранейшаму ў чаканні запаветных квадратаў, чарга штогод расце. Кіраўнік дзяржавы даручыў ураду, губернатарам і мэру Мінска павялічыць аб'ёмы будаўніцтва для гэтай катэгорыі грамадзян і забяспечыць іх жыллём на працягу года.