Прэзідэнт Беларусі патрабуе прыкласці максімум высілкаў для максімальнага ўраджаю

Кіраўнік дзяржавы сёння наведаў Мінскі раён, дзе азнаёміўся з ходам уборачнай на палях 1-й мінскай птушкафабрыкі. Аляксандр Лукашэнка агледзеў два палі - азімай трыцікале і пшаніцы, абедзве культуры беларускай селекцыі з добрай ураджайнасцю 60-70 цэнтнераў з гектара. Уборачная тут на экватары, аграрыі абяцаюць скончыць кампанію за 10-11 дзён. Пры гэтым важна комплексна ўлічваць умовы надвор’я і берагчы людзей. Бо менавіта ад чалавека працы залежыць ураджай.

Надвор'е сёлета не спрыяе аграрным рэкордам, але Аляксандр Лукашэнка адзначыў, што нават пры паніжэнні на паўмільёна аб'ёму ўраджаю ў суаднясенні да мінулага года яго цалкам хапае і для патрэб насельніцтва, і для патрэбнасцяў жывёлагадоўлі і аграперапрацоўкі. Дзяржаўны рэзерв на паўтара мільёна тон з лішкам кампенсуе патрэбнасці харчовай прамысловасці, а недабор па кармавых гатунках таксама з лішкам перакрываецца высокім ураджаем кукурузы і травы. Яшчэ адным стымулам сабраць кукурузу своечасова і да зярнятка плюс захаваць траву Прэзідэнт назваў крытычныя неўраджаі на Еўразійскім кантыненце. Гэта пагражае імпарцёрам ростам цэн і паніжэннем якасці збожжа на сусветных рынках.

І сапраўды, занадта гарачае і на рэдкасць сухое лета прывяло да таго, што паліў у многіх краінах можна здзяйсняць хіба што слёзамі па ўраджаі. Нямецкія фермеры чакаюць страт больш як на мільярд еўра ад таго, што чаканні дажджу не апраўдваюцца з красавіка. З асноўных плошчаў Саксоніі-Анхальта не дабяруць мінімум адну пятую ад нормы збожжа. Фермеры патрабуюць ад улад кампенсацый і падатковых ільгот, але пакуль на гэта Берлін пайсці не гатовы. На гэтым фоне на таварных біржах Германіі і суседняй Францыі ў рост пайшлі цэны, ужо перавысіўшы прагнозы на дзесяць працэнтаў. Лічыць страты казны рыхтуюцца і ў Фінляндыі, дзе не далічацца амаль траціны звыклага ўраджаю. Урад Літвы ад засухі вырашыўся аб'явіць экстрэмальную сітуацыю. Гэта дасць фермерам шанц сысці хоць бы ад штрафаў па недапастаўках, якія чакаюцца больш як на 15 %. І нават адзін з найбуйнейшых экспарцёраў пшаніцы - Расія - не дакладзе ў агульнасусветны каравай да 100 мільёнаў тон. Адбудзецца гэта таму, што праз адсутнасць дажджоў яе ўраджай стане мінімальным за шэсць апошніх гадоў.

Таксама сёння Кіраўнік дзяржавы адказаў на пытанні журналістаў. У прыватнасці, пракаментаваў асобныя заклікі далёкіх ад АПК экспертаў вярнуцца да пашыранага імпарту збожжа і харчавання, скараціўшы пры гэтым інвестыцыі ва ўласную сельскую гаспадарку. Прэзідэнт адзначыў, наколькі важнай галіной для нашай краіны застаецца сельская гаспадарка з пункта погляду харчовай бяспекі, стварэння рабочых месцаў, развіцця аграпрамысловасці і нават захавання суверэнітэту Беларусі.

У цэлым па краіне, паводле звестак на раніцу сённяшняга дня, убрана амаль 42 % збожжа. Ужо сабрана два з паловай мільёны тон хлеба. Наперадзе па-ранейшаму поўдзень - у Брэсцкай вобласці засталося ўбраць чвэрць палёў. На другое месца па намалоце выйшаў сталічны рэгіён - 640 500 тон збожжа. Тут з'явіўся першы экіпаж двухтысячнікаў. Больш за палову ўраджаю сабрана ў Гродзенскай вобласці. Тут самая высокая ўраджайнасць па краіне - 30,8 цэнтнераў з гектара. Аграрыі Гомельшчыны сабралі 245 000 тон хлеба. Віцебскі рэгіён набліжаецца да адзнакі 200 000 тон, Магілёўскі - 155 000.