Прэзідэнт чыноўнікам: Не трэба "паказушнічаць"

Прэзідэнт патрабуе актыўнага ўцягвання прамысловых прадпрыемстваў Беларусі ў працу па імпартазамяшчэнні. Нараўне з развіццём машынабудавання і нафтахіміі - гэта адна з ключавых тэм рабочай паездкі ў Бабруйск.

У маршруце Прэзідэнта два найбуйнейшыя прадпрыемствы Магілёўскай вобласці - "Бабруйскаграмаш" і "Белшына", аднак размова не толькі пра эканоміку гэтых гігантаў, але і ў цэлым пра працу Мінпрама. На Бабруйскаграмашы сабраліся кіраўнікі найбуйнейшых прамысловых прадпрыемстваў Беларусі. Кожнаму ёсць што распавесці аб праробленай працы, бо санкцыі далі імпульс да імклівага развіцця ўласных распрацовак і ўкаранення тэхналогій. Беларусы многае ўмеюць рабіць самі. Прэзідэнту прадэманстравалі шырокі спектр імпартазамяшчальнай прадукцыі беларускай вытворчасці. Дэталёвая размова аб сітуацыі склалася таксама з дырэктарамі МАЗа і МТЗ. Як зазначыў Прэзідэнт, калі Мінпрам вытрымае, то і краіна будзе працаваць.

Кіраўнік дзяржавы таксама звярнуў увагу на шэраг аб'ектаў у горадзе, у тым ліку сацыяльнай інфраструктуры, інтэрнаты, якія неабходна прывесці ў парадак. Факты безгаспадарчасці выявіў Камітэт дзяржкантролю. Губернатару пастаўлена задача выправіць сітуацыю да 1 студзеня. Прэзідэнт даў таксама даручэнні па развіцці вытворчай сферы і будаўніцтве жылля ў рэгіёнах. Прапанаваў пры неабходнасці распаўсюдзіць шэраг ільготных умоў на рэгіянальны ўзровень.

На Белшыне размова таксама значна шырэйшая за стан спраў на адным прадпрыемстве. Размова аб мінімізацыі наступстваў санкцый, развіцці канцэрна "Белнафтахім" і рэалізацыі інвестпраекта па вытворчасці суцэльнаметалакордных шын. Гэта складаная тэхналогія, якая павышае зносастойкасць і даўгавечнасць вырабу.

Шэраг актуальных тэм узняты таксама падчас зносін Аляксандра Лукашэнкі з працоўным калектывам. І гэта не толькі імпартазамяшчэнне, санкцыі, націск Захаду, але і рост цэн, а таксама сітуацыя ва Украіне.

Што датычыцца росту цэн, Прэзідэнт звязвае сітуацыю са знешнімі фактарамі, але папярэджвае, што нажывацца на гэтым нікому не дазволена. Сітуацыя ў свеце няпростая, крызіс. Імпартазамяшчэнне - самае галоўнае пытанне, якое дасць імпульс развіццю нашай эканомікі.