Патрабаванне Прэзідэнта да губернатараў і мэра сталіцы - завяршыць будаўніцтва ўсіх даўгабудаў у 2019 годзе

Павышэнне эфектыўнасці будгаліны Беларусі - галоўная тэма маштабнай дыскусіі ў рамках рэспубліканскага семінара, удзел у якім сёння прыняў Прэзідэнт. У Палац Незалежнасці запрасілі каля 250 чалавек - гэта кіраўнікі профільных прадпрыемстваў, галіновай прамысловасці, губернатары і ўрад. Сустрэчы ў такім фармаце праводзіліся не раз і даказалі сваю эфектыўнасць. Такое абмеркаванне праблем і рашэнні для іх на ўзроўні Кіраўніка дзяржавы дэталёва разглядалі ў ЖКГ і аграпрамысловым комплексе. Гэтым разам уся ўвага сканцэнтравана на адной з ключавых галін, якая так або інакш тычыцца кожнага беларуса. Сёння падчас семінара-нарады Прэзідэнт даў шэраг прынцыповых даручэнняў. У першую чаргу яны тычацца ключавых пытанняў: цаны, якасці і тэрмінаў будаўніцтва.

Падрабязнасці ў Ілоны Красуцкай.

Будучыня будаўнічай галіны краіны. Тэма, якая сёння абмяркоўваецца на ўзроўні Прэзідэнта, самая што ні ёсць народная. Так, за апошнія гады для развіцця было зроблена нямала. І сёлета нават назіраецца рост асноўных паказчыкаў. Тым не менш чамусьці пры першым згадванні ўзнікаюць малапрыемныя асацыяцыі: адвечная праблема даўгабудаў, факты карупцыі і непад’ёмнасць цаны квадратнага метра. Усе гэтыя пытанні дэталёва абмеркавалі ў Палацы Незалежнасці, кожнае суправаджалася кропкавымі даручэннямі Кіраўніка дзяржавы: ад цаны квадрата, падтрымкі шматдзетных сем'яў да развіцця малых населеных пунктаў.

Пачатак маштабнай дыскусіі з самых набалелых пытанняў - гэта цана, якасць і тэрміны будаўніцтва жылля. Па ўсіх гэтых пазіцыях па-ранейшаму нямала нараканняў. У прыярытэце застаецца формула - 1 квадратны метр з дзяржпадтрымкай не вышэйшы за сярэднюю зарплату па краіне. Пры гэтым дасягненне яе ўзроўню ў тысячу рублёў не азначае, што метр павінен каштаваць столькі ж. У краіне на дадзены момант 35 даўгабудаў. Гэта, вядома, ужо не такая вялізная лічба, як яшчэ 5 гадоў таму - іх было 380. Але за кожным такім негатыўным прыкладам - людскія лёсы, патрачаныя нервы, грошы. Патрабаванне Прэзідэнта адрасавана губернатарам і мэру сталіцы - узяць пад асабісты кантроль і завяршыць будаўніцтва ўсіх даўгабудаў у краіне. Апошні тэрмін - першая палова наступнага года.

Асобнае даручэнне Кіраўніка дзяржавы тычыцца падтрымкі шматдзетных сем'яў. Большасць з іх па-ранейшаму ў чаканні запаветных квадратаў, пры гэтым чарга штогод расце. Аб'ёмы будаўніцтва для гэтай катэгорыі павялічаць. У перспектыве атрымаць жыллё яны змогуць на працягу года.

Абмеркавалі сёння і сітуацыю на рынку арэнднага жылля. Яго доля ў краіне таксама будзе павялічана. Шэраг патрабаванняў і даручэнняў Прэзідэнта тычыўся і развіцця гарадоў-спадарожнікаў. Яшчэ ў 2014 быў падпісаны адпаведны ўказ, але дагэтуль застаюцца нявырашаныя пытанні. Большасць насельніцтва па-ранейшаму сканцэнтравана ў буйных гарадах. Цэнтрам прыцягнення павінны стаць не толькі аграгарадкі, малыя гарады, але і крыху большыя. Напрыклад, такія як Баранавічы, Бабруйск, Маладзечна, Орша. Мінбудархітэктуры даручана рэалізаваць пілотны праект па комплекснай забудове раёнаў малаэтажнымі дамамі.

Апроч рабочых месцаў у рэгіёнах, трэба ствараць і камфортнае асяроддзе для жыцця людзей, адпаведную інфраструктуру, асабліва гэта тычыцца раёнаў-новабудоўляў. Знайсці для іх годныя дызайнерскія рашэнні - яшчэ адна задача. Паспяховыя прыклады ёсць літаральна за кальцавой Мінска. Найбліжэйшыя тры гады ў Беларусі пройдуць пад знакам малой радзімы, а 2019 у цэлым прысвечаны добраўпарадкаванню краіны. Заканамерна, што асаблівую ўвагу нададуць азеляненню тэрыторый. Гаварылі і пра новыя змяненні ў будаўнічай галіне. Профільныя арганізацыі ўзмоцняць працу з навучальнымі ўстановамі па мэтавым наборы. Як сёння анансаваў Кіраўнік дзяржавы, нарады ў такім фармаце стануць рэгулярнымі. Прыярытэтныя задачы для будкомплексу краіны названыя. Зараз кіраўніцтву профільных прадпрыемстваў і галіновай прамысловасці трэба аператыўна ўключыцца ў працу, а ацэнкай яе эфектыўнасці стане вынік.