Прэзідэнт: Няма нічога больш важнага, чым захаванне міру

У Мінску гэтымі днямі абмяркоўваюць пытанні бяспекі ў рэгіёне і свеце. Напярэдадні ў Палацы Незалежнасці адкрылася сустрэча Асноўнай групы Мюнхенскай канферэнцыі. Удзел у ёй прыняў Прэзідэнт Беларусі. Аляксандр Лукашэнка справядліва адзначыў: пытанне захавання міру актуальнае як ніколі. Попыт на мірны дыялог, за які выступае наша краіна, сёння высокі. Гэта пацвярджае і жаданне з боку многіх замежных дэлегацый асабіста сустрэцца з беларускім лідарам. Гэтымі днямі прэзідэнцкі графік як ніколі шчыльны.

Расказвае Наталля Брэвус.

Няма нічога больш важнага, чым захаванне міру. З гэтых слоў пачаў беларускі Прэзідэнт сваю прамову на адкрыцці сустрэчы Асноўнай групы Мюнхенскай канферэнцыі па бяспецы. Мінск сабраў больш чым сто аўтарытэтных удзельнікаў. Гэта кіраўнікі дзяржаў, прэм'ер-міністры еўрапейскіх краін, кіраўнікі знешнепалітычных ведамстваў, уплывовыя міжнародныя эксперты. Прадстаўнічы форум, дзе абмяркоўваюць болевыя пытанні: ад канфлікту ва Украіне да рознагалоссяў па лініі Усход - Захад.

Відавочна, што ўсёй Еўропе патрэбныя новыя дамоўленасці па бяспецы. Логіка афіцыйнага Мінска ідзе ад жыцця - лепш гады перамоў, чым адзін дзень вайны. Аляксандр Лукашэнка адзначыў рост прыхільнікаў запуску перагаворнага працэсу паміж Усходам і Захадам. Ініцыятыва, прапанаваная Беларуссю, - "Хельсінкі-2". Ключавое пытанне бяспекі ў Еўропе - вырашэнне ўкраінскага канфлікту.

Беларусь знаходзіцца на геаграфічным скрыжаванні Еўропы, фактычна заціснутая паміж геапалітычнымі гігантамі. Мы не хочам апынуцца на лініі новага цывілізацыйнага разлому, на лязе блокавага супрацьстаяння паміж Усходам і Захадам. Беларусы як ніхто іншы ведаюць, якія наступствы гэта можа выклікаць. Таму так актуальна гучыць прапанова Мінска зрабіць Усходнюю Еўропу трансгранічным поясам стабільнасці і ўзаемадзеяння.

Прыезд у Мінск аўтарытэтных палітыкаў з усяго свету - магчымасць сустрэцца для абмеркавання двухбаковых пытанняў. З памочнікам Дзяржсакратара ЗША па еўрапейскіх і еўразійскіх справах Ааронам Уэсам Мітчэлам гаварылі аб прагрэсе ў адносінах Мінска і Вашынгтона і жаданні развіваць супрацоўніцтва. А вось у размове з Прэм'ер-міністрам Сербіі пацверджана: Бялград і надалей можа разлічваць на падтрымку Беларусі. Усе гэтыя перамовы праходзілі, вядома, на фоне думак аб глабальнай бяспецы.

Шчыра і адкрыта (чаго часам так не хапае сёння ў вялікай палітыцы) Аляксандр Лукашэнка агучыў пазіцыю Беларусі па пытаннях бяспекі ў рэгіёне і свеце. Сёння прадстаўнічы форум прадоўжыць сваю работу ў Мінску. Сярод тэм, якія будуць абмяркоўвацца, напрыклад, будзе пошук шляхоў вырашэння рэгіянальных канфліктаў. Гэта значыць і сёння на Мінскай пляцоўцы будуць гаварыць пра тое, як знізіць градус напружання на планеце і ўмацаваць давер паміж Усходам і Захадам.