Прэзідэнт падпісаў указ "Аб развіцці СМІ"

Указ, які вызначае далейшае развіццё сродкаў масавай інфармацыі, падпісаў сёння кіраўнік дзяржавы. Дакумент прыняты з мэтай забеспячэння ўстойлівага эканамічнага становішча нацыянальных СМІ, вытворчасці ў неабходным аб'ёме якаснага беларускага кантэнту. Указам устанаўліваецца збор за размяшчэнне рэкламы памерам 10 % пры размяшчэнні вонкавай рэкламы і рэкламы на транспарце, у іншых выпадках - 20 % ад кошту паслуг па распаўсюджванні рэкламы. Збор будзе выплачвацца рэкламадаўцамі і накіроўвацца на падтрымку дзяржаўных сродкаў масавай інфармацыі. Акрамя таго, на 1 працэнт - да 26 - павышана стаўка ПДВ пры аказанні паслуг перадачы даных.

На мінулым тыдні праект гэтага ўказу абмяркоўваўся на нарадзе кіраўніка дзяржавы з кіраўнікамі найбуйнейшых беларускіх СМІ. Аляксандр Лукашэнка распавёў, што дакумент ужо разглядалі некалькі разоў з розных бакоў і ўрад, і Адміністрацыя Прэзідэнта. Нядаўна ў краіне пачала працаваць айчынная сістэма медыявымярэнняў, якая павінна забяспечыць празрыстасць рынку, створаны рэестр рэкламных распаўсюджвальнікаў.