Прэзідэнт прыняў з дакладам міністра замежных спраў Уладзіміра Макея

На сустрэчы абмеркавалі развіццё адносін з Еўразійскім і Еўрапейскім саюзамі, графік міжнародных сустрэч, вынікі знешнеэканамічнай дзейнасці. Прэзідэнт нагадаў, што прыярытэтам нумар адзін застаецца эканоміка, а яе аснова - гэта экспарт. Менавіта з акцэнтам на экспарт павінна развівацца знешнеэканамічная дзейнасць. Як далажыў Уладзімір Макей, у першым паўгоддзі адзначаецца пазітыўная тэндэнцыя: экспарт дадаў амаль 20 працэнтаў.

Абмеркавалі і наступныя міжнародныя сустрэчы Кіраўніка дзяржавы. Як адзначыў міністр замежных спраў, да канца года графік будзе шчыльным. Акрамя замежных візітаў (а найбліжэйшы - у сярэдзіне верасня ва Узбекістан), высокіх гасцей чакаюць і ў Мінску. Беларуская сталіца прыме і шэраг маштабных міжнародных мерапрыемстваў, такіх як канферэнцыя АБСЕ "Прадухіленне і барацьба з тэрарызмам у лічбавую эпоху" і сустрэча асноўнай групы Мюнхенскай канферэнцыі па бяспецы.