Прэзідэнт паставіў задачу не зніжаць тэмп і ўдвая палепшыць фінансавыя паказчыкі прадпрыемстваў ВПК

Прэзідэнт прыняў з дакладам старшыню Дзяржкамваенпрама Рамана Галоўчанку. Ён узначаліў камітэт напрыканцы жніўня. І настаў час для грунтоўнага даклада. У Беларусі захавалі вытворчую базу і магутныя навуковыя школы, якія дазваляюць ствараць сучаснае ўзбраенне для абароны. Рэальнасць такая: попыт на высокадакладную зброю ў свеце расце. Беларусь вырабляе абарончыя сістэмы, якія з'яўляюцца сур'ёзным фактарам стрымлівання пры цяперашняй няпростай сітуацыі на планеце. У цэлым прадпрыемствы беларускага ВПК працуюць эфектыўна. Аляксандр Лукашэнка паставіў задачу не зніжаць тэмп і ўдвая палепшыць фінансавыя паказчыкі.

Прэзідэнт ставіць перад беларускай абаронкай задачы аператыўна знаходзіць і развіваць новыя напрамкі. Магчымасці па стварэнні перспектыўнага ўзбраення былі прадэманстраваныя Кіраўніку дзяржавы ў пачатку кастрычніка на палігоне ў Івацэвіцкім раёне.

Беларуская армія сёння абсталёўваецца па лепшых сусветных стандартах. Намаганні распрацоўшчыкаў зараз сканцэнтраваныя на развіцці ракетабудавання. Наглядным прыкладам паспяховай распрацоўкі нашых навукоўцаў з'яўляецца рэактыўная сістэма залпавага агню новага пакалення "Паланэз". Сярод прыярытэтаў беларускіх збройнікаў і такія высокатэхналагічныя напрамкі, як стварэнне лінейкі ўдарных беспілотных авіякомплексаў розных тыпаў. Гэты сегмент лічыцца прарыўным. Беспілотнікі могуць калі не замяніць пілатуемую авіяцыю, то істотна яе ўзмацніць. Добра абсталяваныя Узброеныя сілы – залог спакою і магчымасць хутка, адэкватна адказваць на пагрозы. Тэмп жыцця і хуткасць развіцця навукова-тэхнічнага прагрэсу ўплываюць і на тэрміны распрацоўкі і пастаноўкі на ўзбраенне ўзораў тэхнікі. Калі раней складаныя сістэмы маглі распрацоўвацца дзесяцігоддзямі, то зараз усё значна хутчэй. Пры гэтым патрэбныя вывераныя падыходы ў абаронным сектары.

Важным паказчыкам эфектыўнасці Дзяржкамваенпрама з'яўляецца экспарт. Тут штогадовы рост. З 2004 года пастаўкі прадукцыі за мяжу павялічыліся амаль у 7 разоў. У лічбах гэта ўжо больш за мільярд долараў. У свой час Прэзідэнтам было прынята прынцыповае рашэнне не даць загубіць гэты сектар эканомікі і важную частку нацыянальнай абароны. Менавіта па ініцыятыве Аляксандра Лукашэнкі 15 гадоў таму быў створаны дзяржкамітэт, які сёння праводзіць адзіную палітыку ў галіне абароны і ў ваенна-тэхнічнай сферы.