Развіццё гарбарна-футравай вытворчасці сёння ў цэнтры ўвагі Кіраўніка дзяржавы

Пра выкананне даручэнняў па развіцці гэтай галіны ўрад далажыў на пляцоўцы Віцебскага футравага камбіната. Гэта адзінае прадпрыемства ў краіне, якое спецыялізуецца на перапрацоўцы вялікага асартыменту пушніны, аўчыны і каракулевай сыравіны. З яго тут шыюць вопратку, галаўныя ўборы і аксесуары. Завод з гісторыяй пачаў працаваць яшчэ больш за 40 гадоў таму. Але да сярэдзіны 2000-х камбінат прыйшоў у заняпад. Старое абсталяванне пакідала прадукт далёка ззаду новых модных трэндаў. Страціць майстроў і фактычна адзінае буйное прадпрыемства такога профілю было недапушчальна. Дзякуючы ўказу Прэзідэнта ў 2013 Віцебскі футравы за адну базавую прадалі кампаніі "Марка", але з жалезнай умовай: зрабіць сучасную і эфектыўную вытворчасць. Пакуль ішла мадэрнізацыя, частку калектыву працаўладкавалі ў холдынгу.

Прэзідэнт азнаёміўся з тэхналагічнымі працэсамі па вырабе аўчыны і пушніны. Пагутарыў з супрацоўнікамі прадпрыемства. Аляксандра Лукашэнку цікавілі тонкасці вытворчасці. Пасля абнаўлення ад старога камбіната засталіся толькі назва і сцены, якія, зрэшты, таксама не пазнаць. Трыста тысяч штук аўчыны і дзвесце пяцьдзясят тысяч шкурак пушніны - менавіта столькі сыравіны за год камбінат зможа перапрацоўваць пасля мадэрнізацыі. Працуюць з айчыннай і імпартнай сыравінай. І калі норку, пясца, лісіцу закупляюць у асноўным у Беларусі, то аўчыну заказваюць у Расіі, у Новай Зеландыі, Іспаніі і Уругваі. Кадры і сыравіну Аляксандр Лукашэнка назваў найважнейшымі для нармальнай працы гэтага прадпрыемства.

Бізнес, які працуе на карысць людзей і краіны, заўсёды можа разлічваць на падтрымку дзяржавы. Ішла размова аб тым, каб частку крэдытных сродкаў, якія вылучаныя беларускаму боку Кітаем, накіроўваць на падтрымку прыватнага бізнесу. Такую задачу Прэзідэнт паставіў кіраўніцтву ўрада.