Ашчадбанк Расіі мае намер павялічыць аб'ём інвестыцый у Беларусь

Дамоўленасці дасягнуты сёння ў Палацы Незалежнасці, дзе Прэзідэнт абмеркаваў супрацоўніцтва з кіраўніком найбуйнейшага расійскага банка.

Аляксандр Лукашэнка падзякаваў Герману Грэфу за актыўнае інвеставанне і крэдытаванне эканомікі. Укладваць у Беларусь фінансавая карпарацыя пачала 8 гадоў таму, калі выкупіла акцыі БПС-Банка. За гэты час сума прамых інвестыцый склала 4 мільярды долараў. Прыход на рынак гульца такога ўзроўню - гэта лепшае пацвярджэнне прывабнасці краіны для замежнага капіталу.

У сваю чаргу Герман Грэф адзначыў, што гэтым разам прыехаў з партфелем новых прапаноў, прычым не толькі ў банкаўскім сектары. Так, Ашчадбанк гатовы падтрымаць у Беларусі адукацыйныя праекты, працягне інвеставаць у будаўніцтва. Так, у мінулым годзе банк выкупіў даўгабуд у цэнтры Мінска. Кіраўнік расійскага банка паабяцаў, што будынак ля Белдзяржцырка, які першапачаткова планаваўся як гасцініца, дабудуюць на працягу года. Там размесцяцца сучасныя офісы, магазіны і рэстараны. Фінансава падтрымаюць і экспарт.

Увасабленнем праектаў у жыццё зоймецца новы кіраўнік беларускай структуры. Герман Грэф праанансаваў рашэнне змяніць кіраўніцтва БПС-Ашчадбанка. Адзначым, Ашчадбанк называюць крывяноснай сістэмай расійскай эканомікі, гэта траціна яе банкаўскай сістэмы. Толькі ў Расіі паслугамі фінансавай структуры карыстаюцца 110 мільёнаў кліентаў, яшчэ 11 мільёнаў за мяжой. Геаграфія даччыных структур Ашчадбанка ахоплівае 20 краін па ўсім свеце.