У Сочы адбыліся перамовы Аляксандра Лукашэнкі і Уладзіміра Пуціна

На сустрэчы ў Краснай Паляне наш Прэзідэнт заявіў, што адносіны Беларусі і Расіі непарушныя, хто б што ні пісаў і ні гаварыў. Уладзімір Пуцін у сваю чаргу адзначыў, што наша краіна для Расіі з'яўляецца найважнейшым стратэгічным партнёрам і саюзнікам. На перамовах прысутнічаў міністэрскі і ўрадавы пул дзвюх дзяржаў. Адносіны Мінска і Масквы знаходзяцца на высокім узроўні з пункта гледжання ўсіх магчымых кірункаў міждзяржаўнага ўзаемадзеяння - палітыкі, эканомікі, сацыяльнай сферы і культуры. Узаемны тавараабарот паказвае рост - па выніках мінулага года ён перавысіў 35 мільярдаў долараў. Гаворачы, напрыклад, пра супрацоўніцтва ў сферы паставак харчавання, Аляксандр Лукашэнка асобна падкрэсліў высокую якасць вырабленых у Беларусі прадуктаў і гатоўнасць пастаўляць іх у неабходных аб'ёмах на расійскі рынак. Закранулі ў размове міжнародную тэматыку і эканамічныя пытанні.

Аляксандр Лукашэнка і Уладзімір Пуцін прадоўжаць перамовы і ў наступныя дні. Заўтра Сочы прымае трохбаковы саміт па Сірыі, сустрэцца з яго ўдзельнікамі запрасілі і беларускага лідара. Прэзідэнт адзначыў, што падчас яго візіту ў Расію будзе магчымасць пагаварыць не толькі па пытаннях міжнароднай палітыкі і эканомікі, але і па гуманітарнай тэматыцы. Плануецца, што да размовы падключацца і профільныя міністры. Такі фармат зносін запланаваны ў рамках наведвання адукацыйнага цэнтра "Сірыус". Навучанне юных талентаў там праводзяць адразу па трох кірунках: навука, мастацтва і спорт.

Пасля завяршэння дзелавой сустрэчы з удзелам членаў урадаў у Краснай Паляне кіраўнікі дзяржаў разам адправіліся на адну з сочынскіх гарналыжных трас. Іх з'яўленне стала сюрпрызам для многіх дзясяткаў аматараў зімовага спорту. Яны адразу акружылі прэзідэнтаў, здымаючы іх на відэа і робячы сэлфі.