Вышэйшы дзяржаўны савет Саюзнай дзяржавы сёння пачынае сваю працу

Лідары Беларусі і Расіі сустрэнуцца ў Палацы Незалежнасці. Чакаецца, што самалёт прэзідэнта Расіі здзейсніць пасадку ў Нацыянальным аэрапорце Мінск у сярэдзіне дня. Для Аляксандра Лукашэнкі і Уладзіміра Пуціна гэта будзе трэцяя сустрэча менш як за два тыдні - пасля размовы на палях саміта Шанхайскай арганізацыі супрацоўніцтва і на адкрыцці чэмпіянату свету па футболе. У складзе расійскай дэлегацыі і прэм'ер-міністр Дзмітрый Мядзведзеў, старшыні і прадстаўнікі абедзвюх палат парламента Расіі. Пра тэмы і пытанні перамоў - Аляксей Марцінёнак.

Гэта ўжо 22-і візіт Уладзіміра Пуціна ў Мінск. Часцей расійскі лідар бываў толькі ў Казахстане - 24 разы. Яно і зразумела: некалі ўнікальны фармат Мытнай "тройкі" проста дыктаваў самы цесны кантакт. Ды ўсё ж галоўная і самая перадавая постсавецкая інтэграцыя - гэта Саюзная дзяржава. Той лакаматыў, дзе ёсць месца і давернаму эксперыменту, і адважным крокам наперад. Бо ў аснове - адно вялікае агульнае мінулае двух братэрскіх народаў.

Вышэйшы дзяржсавет дэталёва рыхтавалі на ўсіх узроўнях: міністэрствы, рэгіянальныя ўлады, галіновыя і вытворчыя эксперты - усе са сваімі ідэямі і напрацоўкамі.

Незадоўга да сустрэчы прэзідэнтаў рысу пад галоўнымі тэмамі падвёў саюзны Савет міністраў. У інфармацыйным спісе: развіццё лічбавай эканомікі, вытворчай кааперацыі, пастаўкі харчавання, супрацоўніцтва ў сферы АПК і машынабудавання.

Аграпрамысловы комплекс - знак беларускай якасці, які даўно зведалі расіяне. І тут важна разам трымаць марку ў асобных кірунках. Ужо распрацоўваецца магчымасць стварэння сумеснай селекцыйнай праграмы. У той жа час на агульнай аграрнай ніве хапае і вострых пытанняў.

Машынабудаванне - апорны пункт, тое, з чаго краіны пачыналі аднаўляць разбураную сувязь. Зараз узровень кааперацыі проста фантастычны. Узяць хоць бы Мінскі трактарны завод, на які зараз працуе паўтары сотні пастаўшчыкоў з Расіі.

З такіх прыватнасцяў паступова і вырас агульны ўражлівы ўзровень эканамічнай інтэграцыі. З моманту ўзнікнення Саюзнай дзяржавы за кошт гэтага адзінства было створана тры мільёны рабочых месцаў! Летась тавараабарот Беларусі і Расіі вырас на 23,5 %, зараз ён звыш 32 мільярдаў долараў.

Патэнцыял, вядома, нашмат вышэйшы. Эксперты ўжо робяць прагнозы на рэкордныя 40 мільярдаў. Улічваючы тое, як аператыўна ўмеюць дамаўляцца Мінск і Масква, такі партнёрскі поспех, і праўда, - справа часу.