Пасяджэнне Вышэйшага дзяржсавета Саюзнай дзяржавы пройдзе сёння ў Мінску

Беларуска-расійскія перамовы на вышэйшым узроўні. Аляксандр Лукашэнка сустрэнецца са сваім расійскім калегам Уладзімірам Пуціным. У Мінску сёння пройдзе пасяджэнне Вышэйшага дзяржаўнага савета Саюзнай дзяржавы. Нягледзячы на тое што на парадку дня дзясятак пытанняў, чакаецца, што абмяркоўвацца будзе ўвесь спектр двухбаковых адносін ад эканомікі да ўзгодненасці дзеянняў у знешняй палітыцы. У наступныя гадзіны чакаецца прыбыццё кіраўніцтва Расіі. У складзе дэлегацыі і прэм'ер-міністр Дзмітрый Мядзведзеў, старшыні і прадстаўнікі абедзвюх палат парламента Расійскай Федэрацыі. У Палацы Незалежнасці ўсё гатова.

Чаго чакаць ад пасяджэння Вышэйшага дзяржсавета і сустрэчы лідараў, спытаем у нашага палітычнага аглядальніка Наталлі Брэвус. Яна на прамой сувязі са студыяй.

Тут гатовасць нумар адзін. Прычым ва ўсіх сэнсах. І не толькі арганізацыйных. Перад гэтай сустрэчай лідараў Беларусі і Расіі зробленая вялікая праца. Агульныя пытанні абмяркоўвалі і ўрады краін у Маскве, і парламентарыі ў Брэсце.

На парадку дня пасяджэння Вышэйшага дзяржсавета - 9 пытанняў, ад выканання саюзнага бюджэту да прыярытэтаў Саюзнай дзяржавы і развіцця аб'яднання ў наступныя пяць гадоў. Плануецца абмеркаваць і праграму ўзгодненых дзеянняў у знешняй палітыцы на наступныя два гады - менавіта такім чынам дзейнічаюць афіцыйны Мінск і Масква. Але сустрэча ў такім фармаце, як сёння, вядома, магчымасць абмеркаваць стан двухбаковых адносін.

За мінулы год тавараабарот паміж краінамі падрос - сума агульнага гандлю перавысіла 32 мільярды долараў. Гэта, вядома, не 43 - а была і такая лічба ў гісторыі двухбаковай эканомікі, але паболей, чым у папярэднія некалькі гадоў. Прыходзіцца прыкладаць высілкі, каб пераадольваць спад у агульнай эканоміцы. Бар'еры ў гандлі гэтаму дакладна не спрыяюць. Тысячы нітак злучаюць Беларусь і вобласці Расіі. За гэтыя гады змаглі наладзіць дыялог і гандаль амаль з усімі суб'ектамі федэрацыі.

Мы пільна будзем сачыць за сустрэчай лідараў. Прэса - а акрэдытавана больш за сотню журналістаў - заўсёды імкнецца на сухіх пратакольных кадрах разглядзець настрой і паводзіны палітыкаў, якія хоць неяк пральюць святло на нюансы перамоў. Супрацоўніцтва з Расіяй шырокае, таму заўсёды хапае пытанняў - адны толькі недружалюбныя дзеянні Рассельгаснагляда апошні час чаго вартыя. Можна выказаць здагадку, што, апроч АПК і паставак харчавання, закрануць тэму машынабудавання і нашы сумесныя праекты. Абмяняюцца прэзідэнты і меркаваннямі наконт міжнароднага парадку дня. У пачатку года палітычны істэблішмент у Расіі быў заняты выбарчай кампаніяй, змяняўся, хай і не кардынальна, склад урада. Так што зразумела, на чым была засяроджана ўвага ў гэтай краіне.

Надышоў час грунтоўных беларуска-расійскіх перамоў. Хоць лідары маюць магчымасць кантактаваць. Вось за апошні месяц з моманту інаўгурацыі Пуціна ён і Аляксандр Лукашэнка бачыліся ўжо тройчы. На саміце Еўразійскага саюза ў Сочы, у кітайскім Цындаа і на днях у "Лужніках" у Маскве на адкрыцці чэмпіянату свету па футболе. Вялікая ўвага да гэтай падзеі ў Расіі. Дарэчы, якраз сёння зборная Расіі згуляе свой другі матч у рамках хатняга мундыялю. Цікава і сімвалічна, што ў такі дзень усё кіраўніцтва Расіі будзе ў Мінску.