Самалёт санавіяцыі ўпаў на жылы масіў у Філадэльфіі

У ЗША разбіўся другі за тыдзень самалёт. Гэтым разам упаў санітарны борт Lear 55 на жылы масіў у Філадэльфіі.

У выніку крушэння загінулі не менш за 6 чалавек - гэта ўсе, хто знаходзіўся на борце (2 пілоты, столькі ж медыкаў і пасажыраў: непаўналетні пацыент і чалавек, які яго суправаджаў). Пры гэтым паліцыя дадала, што на зямлі раненні атрымалі не менш за 10 чалавек.

Пры падзенні самалёт пашкодзіў газаправод. На месцы здарэння ўзнік моцны пажар, пацярпелі некалькі дамоў і машын.

Выратавальныя аперацыі працягваюцца, колькасць ахвяр можа павялічыцца. Прычына пакуль не паведамляецца, вядома, што крушэнне адбылося праз 30 секунд пасля ўзлёту. Магчыма, на борце адбыўся выбух балонаў з кіслародам.