Аграрыі цэнтральнага рэгіёна намалацілі мільён тон збожжа

Першы мільён тон збожжа на рахунку Мінскай вобласці. Аграрыі цэнтральнага рэгіёна сёння перасягнулі запаветную мяжу. Намалот з улікам рапсу.

Уклад у агульны каравай унеслі ўсе раёны, але самы важкі - у Нясвіжскага. Агульны вынік тут перавышае ўжо 100 тыс. залатых тон. Сярод лідараў раёна агракамбінат "Сноў". У гаспадарцы адзін з самых высокіх паказчыкаў па ўраджайнасці - 96 цэнтнераў з гектара.

На палях ушаноўваюць і ўладальнікаў асабістых рэкордаў. Так, вызначыўся і першы малады вадзіцель 3-тысячнік. Андрэй Аляксейчык з гаспадаркі "Кухчыцы" Клецкага раёна перавёз 3 тыс. тон збожжа. За высокія тэмпы работ падарунак ад кіраўніцтва і новы кандыцыянер у кабіну рабочага аўто.

Тэмпы ўборкі нарошчваюць з кожным днём. А за пажарнай бяспекай сочаць падраздзяленні МНС. У палях праводзяць рэйды і аглядаюць спецтэхніку. Герметычнасць усіх сістэм і наяўнасць вогнетушыцеляў на борце - абавязковая ўмова бяспечнай працы.