Беларусь і Японія маюць вялікі нявыкарыстаны патэнцыял

Беларусь разлічвае на рост інвестыцыйнай актыўнасці Японіі і павелічэнне тавараабароту. Пра гэта заявіў віцэ-прэм'ер Ігар Ляшэнка сёння на сустрэчы з дэлегацыяй Японскай асацыяцыі па гандлі з Расіяй і новымі незалежнымі дзяржавамі. Паводле слоў намесніка кіраўніка ўрада, 81,5 мільёна долараў узаемнага гандлю - лічбы далёкія ад патэнцыялу Мінска і Токіа.

Госці адзначылі хуткія тэмпы развіцця беларускай IT-сферы, але дадалі, што адной місіі будзе мала для вывучэння яе патэнцыялу. Як адзначылі ва ўрадзе, з гэтага часу там засяродзяцца на павышэнні экспартнага патэнцыялу і пашырэнні кантактаў з японскім бізнесам. Першым крокам да гэтага стаў беларуска-японскі бізнес-форум. Сёння ён сабраў у Нацыянальнай бібліятэцы прадстаўнікоў больш як 70 беларускіх і 25 буйных японскіх кампаній.