Беларуская эканоміка ў сярэднетэрміновай перспектыве прадоўжыць рост

Яго штогадовыя тэмпы складуць ад 2 да 2,5 %. Гэта сёння заявілі эканамісты Сусветнага банка падчас азнаямлення з абноўленым эканамічным аглядам для Беларусі. Стабільнасць на макраўзроўні падтрыманая паспяховай рэалізацыяй грашова-крэдытнай палітыкі. Гэты курс у далейшым паўплывае на развіццё прыватнага сектара эканомікі. Сярод рызык эксперты банка называюць плацяжы па знешнім доўгу, а таксама магчымае зніжэнне знешняга попыту. Галоўным чынам з боку Расіі. Адкрытая беларуская эканоміка залежная ад попыту звонку, а таксама сусветных цэнаў на сыравіну.

"Замацаванню росту беларускай эканомікі, паводле нашых ацэнак, будзе садзейнічаць, па-першае, узважаная манетарная палітыка. Але гэта якраз тое, чаго Беларусь няўхільна прытрымліваецца ўсе апошнія гады. Трэба і надалей трымацца ўстойлівага курсу рубля. А па-другое, гэта работа на паляпшэнне інвестыцыйнага клімату. Прыватніку патрэбныя спрыяльныя ўмовы для развіцця бізнесу, і гэтую лінію Беларусь павінна працягваць надалей".

Акрамя таго, Сусветны банк палепшыў прагноз на гэты год. Чакаецца, што па выніках 2018-га беларуская эканоміка вырасце да 3,4 %.