Будучыя рэгіянальныя праекты Беларусі і Украіны абмяркоўваюць у Гомелі

Кіраўнік украінскай кампаніі папросту ператварае сонечную панэль… у кампактную ручную паклажу!

Такая мабільная прылада працуе па прынцыпе акумулятара. Назапашвае сонечную энергію, а пасля раздае. Нават калі неба зацягнула. Гаспадар гаворыць: такі генератар не тое, што ва Украіне, на ўсёй постсавецкай прасторы ў навінку. Беларускаму рынку ноу-хау магло б спадабацца.

Усё, што Беларусь і Украіна могуць прапанаваць для ўзаемнага развіцця, дэманструе самая вялікая крытая пляцоўка Гомеля. Харчаванне, тэхніка, машыны, агрэгаты. Тут гавораць: сёння супрацоўніцтва рухаюць інавацыі. А будучыня - за "зялёнай" эканомікай.

Як такія тэхналогіі асвойвае вытворчасць, паказвае кіраўнік ровенскіх вытворцаў. А гэта аграрна-прамысловы рэгіён Украіны... Так, мясцовы завод выпускае эмаль-провад (важны складальнік электрарухавікоў для любой тэхнікі) на аснове другсыравіны. Штампаваць не паспяваюць! Еўропа выстройваецца ў чаргу.

Тут вераць: усё новае падхопіць і беларускі рынак. А партнёрства гатовыя ўмацоўваць з заказчыкам любога маштабу. Грошы не пахнуць, аджартоўваецца кіраўнік рэгіянальнай палаты. Ды і пачынаць можна з малога. Галоўнае, каб быў давер. Працаваць на яго ўмацаванне рэгіёнам яшчэ будзе трэба.

Выпрабаваць новы фармат супрацоўніцтва Беларусі і Украіны з акцэнтам менавіта на ўмацаванне міжрэгіянальных сувязяў дамаўляліся на вышэйшым узроўні. Ідэя прагучала летась. Маўляў, больш цеснае рэгіянальнае партнёрства здольнае падцягнуць і гандаль, і кааперацыю. А сёння яшчэ і момант удалы. Беларусам толькі на руку, заўважае беларускі пасол.

У паўднёвай суседцы прайшла бюджэтная дэцэнтралізацыя. Гэта значыць, рэгіёны атрымалі больш фінансавага падсілкоўвання. Менавіта зараз беларускім кампаніям як ніколі выгадна працаваць напроста.

Галоўная эканамічная мэта для дзвюх краін пазначаная ў лічбе - гандляваць на 8 мільярдаў ужо да наступнага года. Як атрымаць вынік? Сёння савет дзелавога супрацоўніцтва аб'яднаў прамыслоўцаў, бізнес, рэгіянальную ўладу ў пошуках адказаў. Вялікія магчымасці ў буйных прамыслоўцаў. Украіна актыўна абнаўляецца. Патрэбная пасажырская, камунальная, будаўнічая тэхніка. Але і малы бізнес недаацэньваць не варта. Сёння ён здольны закрыць шматлікія нішы, не заўсёды зручныя для прамысловых гігантаў.

Украіна - партнёр, правераны гадамі. Па выніках мінулага года і ў гэтым у аб'ёмах тавараабароту і экспарту саступае толькі Расіі.

Пачатак года выдаўся актыўным: гандаль у беларуска-ўкраінскім кірунку прырос на чвэрць і ўшчыльную наблізіўся да 4 мільярдаў. Паўднёвай суседцы адпраўляем нафтапрадукты, угнаенні, цяжкую тэхніку. Пастаўкі ў зваротным кірунку - галоўным чынам прадукты.

Сёння тэндэнцыя росту падтрымана новымі кантрактамі. Яны адбыліся для прадпрыемства "Мазырьсоль", Баранавіцкага баваўнянага аб'яднання, Даманаўскага камбіната. Але 10 мільёнаў долараў - толькі стартавая пляцоўка.

Самы буйны кантракт у Беларуснафты. Нашы буравыя ўстаноўкі будуць больш актыўна працаваць на ўкраінскую нафтагазавую здабычу. За беларускімі кампаніямі - 9 новых свідравін, а таксама сейсмаразведка, пастаўкі абсталявання. Украіна для беларускіх нафтавікоў становіцца адным з ключавых рынкаў нафтасэрвісу.

Галоўныя праекты дзвюх краін сканцэнтраваны ў цяжкім сектары. Машынабудаванне па праве ў статусе стратэгічнага вектару для партнёраў. Бо гэта больш за дзясятак зборачных вытворчасцяў. Трактары, камбайны, ліфты, тралейбусы – ледзь ці не ўсе беларускія прамысловыя гіганты прадстаўлены на Украіне сумеснай зборкай. Але і гэты вытворчы багаж для кааперацыі не мяжа, пераконваюць на форуме.

Першых асоб сваіх рэгіёнаў сёння прымае галоўная гомельская славутасць - палац Румянцавых і Паскевічаў, каб сам-насам абмеркаваць гандлёвыя бар'еры. Больш перашкод у харчавання: працэдуры ўзаемнай сертыфікацыі прадукцыі складаныя. Спрасціць падыходы - значыць вярнуць Украіну ў тройку лідараў - імпарцёраў беларускага малака і мяса. Як было калісьці. Сёння паўднёвая суседка закупляе толькі 2 % з агульнага аб'ёму харчовага кошыка. Зрэшты, губернатары прапаноўвалі і іншыя рашэнні на карысць дзвюх эканомік.

Ужо пасля дыскусій намер падтрымліваць дыялог рэгіёнаў змацавалі подпісамі. Гомель будзе больш цесна працаваць з Запарожжам, Магілёў і Паўднёвы Адэскай вобласці замацавалі статус пабрацімаў. Шэраг дакументаў аб міжрэгіянальным супрацоўніцтве падпішуць яшчэ і заўтра, у другі дзень форуму. Яго пляцоўкі наведаюць кіраўнікі дзяржаў.

Гэтую сустрэчу ўдзельнікі ўжо па праве называюць гістарычным форумам. Ён напэўна паложыць пачатак вялікаму рэгіянальнаму фармату супрацоўніцтва Беларусі і Украіны. Гэтымі днямі гэта асобныя бізнес і навуковыя праекты. Але менавіта яны павінны скласціся ў агульны вялікі поспех дзвюх краін, чыя ўзаемная цікавасць абумоўлена не толькі цесным суседствам, але і сапраўды прадукцыйнай сумеснай працай, якая даказвае сваю эфектыўнасць не адно дзесяцігоддзе. А значыць, браць новыя планкі ў гандлі і кааперацыі сёння зусім не выглядае ілюзорнай задачай.