Да 31 сакавіка беларусам трэба адчытацца аб дадатковых заробках

Больш за 90 % дэкларацый аб прыбытках беларусы падаюць у электронным выглядзе. І гэты лік з кожным годам расце.

У краіне стартавала кампанія па дэклараванні прыбыткаў. Адчытацца аб дадатковых заробках беларусам трэба да 31 сакавіка.

Дэкларацыю можна прынесці асабіста ў падатковую, адправіць поштай або падаць у электронным выглядзе праз асабісты кабінет плацельшчыка. Выгада дыстанцыйнай падачы ў тым, што плацельшчык убачыць папярэдне запоўнены макет дэкларацыі (за яго гэта зробіць падатковая з улікам усіх наяўных у яе звестак). Застанецца толькі праверыць даныя.

Адчытацца перад падатковай трэба ў большасці выпадкаў за прыбыткі, атрыманыя за мяжой або з-за мяжы, пры продажы за апошнія пяць гадоў другой і больш кватэры, гаража або дачы. Падаць дэкларацыю павінны і тыя, хто за мінулы год прадаў дзве або больш легкавыя машыны або адну грузавую.