Флагман айчыннага машынабудавання БелАЗ адзначае юбілей

Брэнду, па якім пазнаюць нашу краіну, - 70. Пад знакам юбілею праходзіць увесь гэты год. І трэба сказаць, у статусе юбіляра Беларускі аўтазавод выглядае вельмі самавіта: да канца 2018 БелАЗ выпусціць 800 машын, што на траціну вышэй за леташні аб'ём. Растуць продажы і прыбытак, экспарт - у 30 краін. А наперадзе - распрацоўка і вытворчасць электрасамазвалаў і беспілотнікаў. Гэта агульнасусветная тэндэнцыя, у якой у нашых інжынераў і канструктараў важкае слова. Ноу-хау ў працы на палігоне ў Жодзіне ўбачыў Аляксей Кандраценка.

Ад першых карпусоў завода "Тарфмаш" і першай 25-тоннай машыны да суперсучасных цэхаў і БелАЗаў-статоннікаў. З далёкага 1948 тэхніка з Жодзіна ўдасканальвалася год за годам. Шмат у чым дзякуючы працы вадзіцеляў-выпрабавальнікаў.

Наўрад ці ветэраны працы Беларускага аўтазавода ўяўлялі, як далёка пойдзе прагрэс. Тое, што паўстагоддзя таму лічылася футурыстычным, сёння - рэальнасць. Беспілотныя самазвал і пагрузчык БелАЗ навочна паказалі, на што здольныя.

Сотні гасцей і дзелавых партнёраў з усяго свету сёння абмеркавалі глабальныя бізнес-планы, а на тэхнашоу ўбачылі чарговыя навінкі белазаўцаў. Напрыклад, кар'ерны самазвал на 290 тон.

Ён, дарэчы, пад увагай прамыслоўцаў з Лацінскай Амерыкі. А гэта ўжо сусветны рэкардсмен - самазвал на 450 тон. Машына памерам з трохпавярховы дом цудоўна манеўруе васьмёркай.

Сёння афіцыйны статус самага вялікага кар'ернага самазвала на планеце - вось за гэтым 450-тоннікам. Але, здаецца, у найбліжэйшыя гады Кнігу рэкордаў Гінеса па гэтай пазіцыі прыйдзецца падрэдагаваць. Брэнд застанецца той жа - БелАЗ, а вось грузападымальнасць можа павялічыцца яшчэ на 100 тон!

Зрэшты, перспектыва 550-тонніка не такая ўжо і недасягальная. Галоўнае, каб з'явіліся шыны пад такую нагрузку. Сённяшнія дасягненні БелАЗа больш адчувальныя: сёлета холдынг выпусціць 800 машын, а гэта на траціну вышэй за ўзровень 2017. Растуць продажы і экспарт, сярод трох дзясяткаў кірункаў супрацоўніцтва ўпершыню з'явіўся Бангладэш.

Ужо заўтра з 11 раніцы БелАЗ будзе даступны для ўсіх ахвотнікаў. 70-годдзе гіганта беларускага машынабудавання дапоўніць дзень адчыненых дзвярэй.