Лукашэнка: Для таго каб у краіне было спакойна, трэба працаваць

Якой павінна быць вёска будучыні? А таксама як выконваюцца даручэнні па рамонце дарог? Прэзідэнт сёння праінспектаваў Магілёўскую вобласць. Першы пункт - аграгарадок Вішаў Бялыніцкага раёна - прыклад для многіх. Паводле слоў Аляксандра Лукашэнкі, добраўпарадкаванне аграгарадкоў невыпадкова стала тэмай яго рабочай паездкі. У Беларусі іх амаль паўтары тысячы, дзе ў асноўным і будзе жыць сельскае насельніцтва. Гэта яшчэ адна прычына, чаму пільная ўвага ў краіне надаецца якасці дарог.

Рабочая паездка ў рэгіёны для мясцовых жыхароў - заўсёды магчымасць абмеркаваць вострыя пытанні напрамую. Прагучала падзяка за дапамогу шматдзетным сем'ям. Аляксандр Лукашэнка анансуе: у Беларусі ўдасканаляць механізмы падтрымкі. Важна, паводле слоў Прэзідэнта, каб грошы даходзілі да дзяцей. Хвалюе людзей і становішча на знешнім контуры. Кіраўнік дзяржавы чарговы раз падкрэсліў, што для таго каб у краіне было спакойна, трэба працаваць.

На парадку дня прэзідэнцкай камандзіроўкі таксама развіццё жывёлагадоўлі. Тыдзень таму ў Салігорску на рэспубліканскім семінары-нарадзе ў прыклад прывялі працу калгаса "Радзіма". Аляксандр Лукашэнка сёння асабіста пераканаўся: тут сапраўды выпрацавана эфектыўная сістэма. Кіраўнік дзяржавы азнаёміўся з арганізацыяй вытворчасці малака на малочна-таварным комплексе гэтай гаспадаркі. Прэзідэнт застаўся задаволены тым, як тут прайшла рэканструкцыя.

Наведваючы фарэлевую гаспадарку "Лохва", Аляксандр Лукашэнка падтрымаў праекты па будаўніцтве ў Магілёўскай вобласці новых рыбаводных комплексаў. Яны будуць прызначаны для вытворчасці ікры фарэлі і рыб каштоўных парод. А Камітэту дзяржкантролю даручана правесці рэвізію выкарыстання сельгасугоддзяў.